Oralda 49 jastaǵy áıel otyz jyl boıy qujatsyz turyp kelgen
«Jumyspen qamtý jáne áleýmettik baǵdarlamalar bóliminiń ómirlik qıyn jaǵdaıda qalǵan adamdardy qaıta áleýmettendirýge arnalǵan ortalyǵy» KMM-dan túsken málimetke qaraǵanda, Elena Aleksanova 1973 jyly Oral qalasynda dúnıe kelgen.
Mektepte tórtinshi synypqa deıin oqyp, 16 jasynda KSRO tólqujatyn alǵan.
2000 jyly tabys taýyp, qujatyn rásimdeımin degen úmitpen kórshiles Reseıge ketken. Alaıda turaqty jumysy bolmaǵandyqtan ári mekenjaıda tirkelmegendikten, qujat ala almaǵan. 2021 jyly ony balalarymen Qazaqstanǵa shyǵaryp jibergen.
Oralǵa kelgennen keıin qaıda ótinish jasaryn bilmegen áıel kóshede, vokzalda, Derkól kentindegi turǵyndar tastap ketken úılerde qonyp júrgen. Sosyn bireýlerdiń keńesimen Derkól ákimdigine kelgen. Derkól kentiniń ákimi Juban Jumaǵalıev ony muqııat tyńdap, atalmysh ortalyqqa jibergen.
Ortalyq qyzmetkerleri túrli mekemelerge suranys hattaryn joldaıdy. Onyń Qazaqstan azamattyǵyna jatatyny anyqtalady. Barlyq qujattar alynǵannan keıin Oral qalasy kóshi-qon polıtsııasyna jiberiledi.
Osylaısha, E.Aleksanova jeke kýálikti aldy. Ol ózin adam qataryna qosylyp, óz eliniń tolyqqandy azamaty retinde sezinetinin jetkizdi. Elena Vasılevna endi turaqty jumysqa ornalasyp, sonymen qatar densaýlyǵyn túzeý úshin medıtsınalyq mekemege barýdy josparlap otyr. Buǵan deıin ony qujatsyz esh jerge qabyldamaǵan.
Ortalyq dırektory Erlan Medetovtiń aıtýynsha, mundaı mysaldar áli de kezdesedi.
«Mekemede KSRO tólqujatymen turyp jatqandar nemese ótinish jasaıtyndar barshylyq. Biz olardyń bárin de qujattandyrýǵa kómektesýge tyrysamyz. Zań bilmeýshiliktiń, túrli sebeptiń saldarynan adamdar ýaqytynda qujat almaıdy. Kóshi-qon organdary jáne memlekettik mekemelerdiń birlesken jumysy nátıjesinde azamattarǵa qolushyn berýdemiz», dedi E.Medetov.
Foto: instagram.com/centr_resotsializatsii_uralsk