Oralda 4700-den astam adam memlekettik qoldaý sharalarymen qamtyldy
Oral qalasy ákiminiń orynbasary Mırbolat Nurjanovtyń óńirlik kommýnıkatsııalar qyzmeti alańynda ótken brıfıng kezinde málim etkenindeı, sonyń ishinde 399-y jastar praktıkasyna, 454-i qoǵamdyq jumystarǵa, 2 582-si turaqty jumysqa joldandy.
Onyń sózine qaraǵanda, 127 adamǵa jańa bıznes ıdeıalaryn júzege asyrý úshin memlekettik granttar berildi. 1093 adam «Bastaý bıznes» jobasy boıynsha oqýǵa jiberildi. Sonymen qatar áleýmettik jumys oryndary, «Alǵashqy jumys orny», «Kúmis jas» jobalary, qysqa merzimdi oqý kýrstary boıynsha joldamalar berildi.
«Ulttyq joba aıasynda 127 adamǵa 400 AEK kóleminde (1 mln 225,2 myń teńge) grant berilse, sonyń 49-y – kóp balaly otbasylar. 11-i – múgedek, 14-i – múgedek balany tárbıeleýshi, ekeýi – AEK alýshylar, bireýi asyraýshysynan aıyrylǵan adam bolsa, 50-i – jastar», dedi M.Nurjanov.
Bıyl qala boıynsha halyqty jumyspen qamtý ortalyǵyna jumysqa ornalasý máselesimen barlyǵy 10 779 adam jolyqty. Olarǵa Ulttyq joba aıasynda «Jastar praktıkasy», «Áleýmettik jumys oryndary», «Qoǵamdyq jumys», «Alǵashqy jumys orny», «Kúmis jas», «Bastaý bıznes» jobalary jáne qysqa merzimdi oqý kýrstary men memlekettik qaıtarymsyz grant boıynsha jumyspen qamtý sharalary usynyldy. 2022 jyldan bastap «Bastaý bıznes» jobasy boıynsha kásipkerlik negizderine oqytý onlaın túrde júzege asyrylýda.
