Oralda 45 mln teńgeni zańsyz ıemdengen kúdikti ustaldy

ORAL. KAZINFORM – Oralda 45 mıllıon teńgeni zańsyz ıemdengen áıel ustaldy, dep habarlaıdy Polisia.kz.

34 jastaǵy qala turǵyny alaıaqtyq jasady degen kúdikke ilindi. Tergeý derekterine sáıkes, ol tabysty arttyramyn degen jeleýmen Bórli aýdanynyń turǵynyn aldap, jalpy somasy 45 mıllıon teńge bolatyn qarajatty ıemdengen.

- Alaıaqtyq áreketter 2023 jyldyń shildesinen 2025 jyldyń qazan aıyna deıin jalǵasqan. Bul jábirlenýshini uzaq ýaqyt jáne júıeli túrde aldap kelgenin kórsetedi, - delingen aqparatta.

Sondaı-aq kúdiktiniń buǵan deıin de osyǵan uqsas qylmystary úshin jaýapkershilikke tartylǵany anyqtaldy.

Qazirgi ýaqytta qylmystyq is qozǵalyp, kúdikti ustalyp, ýaqytsha ustaý ızolıatoryna qamaldy. Qylmystyń barlyq mán-jaıy anyqtalýda.

Aıta keteıik, taǵy bir alaıaq páterler men jer ýchaskelerin tómen baǵada usynǵan.