Oralda 402 dana kıik múıizin tasymaldaǵan turǵyn sottaldy
ORAL. QazAqparat - Oral qalalyq sotynyń 12 shilde kúngi úkimimen Nurǵalı Baıtaqov QR QK 339-babyna sáıkes aıypty dep tanylyp, oǵan 1 jyl 6 aıǵa bas bostandyǵynan aıyrý jazasy belgilendi.
«Qazaqstan Respýblıkasy Táýelsizdiginiń jıyrma bes jyldyǵyna baılanysty raqymshylyq jasaý týraly» QR Zańy 3-baby qoldanylyp, N.Baıqatovtyń jazasy sol merzimge bas bostandyǵyn shekteýmen aýystyryldy, dep habarlaıdy «QazAqparat» tilshisi.
Oral qalalyq sotynan túsken málimetke qaraǵanda, N.Baıqatov sot zalynda bosatyldy.
Sot talqysynda aıtylǵanyndaı, 1967 jylǵy N.Baıqatov tergeý barysynda anyqtalmaǵan tulǵalarmen qylmystyq kelisimge kelip, 402 dana kıik múıizin Almaty qalasyna jetkizbekshi bolǵan.
Sot úkimi zańdy kúshine engen joq.
Eske sala keteıik , jedel aldyn alý sharasy barysynda BQO ІІD uıymdasqan qylmyspen kúres basqarmasynyń qyzmetkerleri 2016 jyly 15 sáýir kúni tańǵy saǵat 05.30-da Oral qalasyndaǵy temirjol vokzaly aýmaǵynan N.Baıqatov aıdaǵan «Toıota Korolla» avtokóligin toqtatyp, teksergen kezde kólik salonynan 402 dana kıik múıizi tabylǵan bolatyn. Munyń quny 170 mln teńge turady.
