Oralda 4 myńnan astam adam memlekettiń qoldaý sharalarymen qamtyldy
ORAL. QazAqparat - Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy aıasynda bıyl Oral qalalyq halyqty jumyspen qamtý ortalyǵyna 378,041 mln teńge bólindi, dep habarlaıdy «QazAqparat» tilshisi.
Ortalyq dırektorynyń mindetin atqarýshy Nursáýle Eleýovanyń aıtýynsha, bıylǵy 1 qyrkúıekke deıin jumysqa ornalasý máselesimen 6944 adam jolyǵyp, sonyń ishinde 2634-i jumyssyz retinde tanyldy.
Segiz aıda 4384 adam memlekettik qoldaý sharalarymen, sonyń ishinde 2085-i turaqty jumyspen qamtyldy. Sondaı-aq 590-y jastar tájirıbesine, 1087-si qoǵamdyq jumystarǵa, 67-si memlekettik jáne salalyq baǵdarlamalar aıasynda, 76-sy áleýmettik jumys oryndaryna, 479-y kásiptik oqýǵa jiberildi. 1298 adam jumyssyz retinde esepte tur, jumyssyzdyq deńgeıi - 0,9 paıyz.
Jyl basynan beri jańadan 2534 jumys orny ashyldy.
«Baǵdarlamaǵa qatysýshylardy tehnıkalyq jáne kásiptik bilimmen jáne qysqa merzimdi kásiptik oqýmen qamtamasyz etý» 1-baǵyty boıynsha 400 jas 1 qyrkúıekten bastap Oral qalalyq bilim berý bólimi arqyly oqý oryndaryna joldandy.
Eńbek naryǵynda suranysqa ıe kásipter boıynsha 976 adamdy qysqa merzimdi kásiptik oqytýmen qamtamasyz etý josparlanýda. Ol úshin memlekettik bıýdjetten 134,682 mln teńge qarastyryldy. Segiz aıda 479 adam (49 paıyz) túrli mamandyqtar boıynsha qysqa merzimdi kásiptik oqýmen qamtyldy.
Baǵdarlamanyń «Jappaı kásipkerlikti damytý» 2-baǵyty boıynsha bıyl 76 adamǵa 294,730 mln teńge kóleminde nesıe berý kózdelgen bolatyn. Qazirgi tańda 273 adam nesıe qarajatyn alýǵa nıet bildirip, mamandardan túrli keńester aldy. 163 adam «Atameken» kásipkerler palatasy qalalyq fılıalyna kásipkerlik negizderin oqý kýrsynan ótýge jiberildi. Kúni búgin qala boıynsha nesıemen qamtamasyz etetin úsh ekinshi deńgeıli bank, atap aıtqanda, «Reseı jınaq banki» AQ enshiles fılıaly, «Qazaqstan Halyq banki» AQ fılıaly jáne «TsentrKredıt banki» AQ fılıaly anyqtaldy.
Baǵdarlamanyń «Halyqty jumyspen qamtýǵa járdemdesý jáne eńbek resýrstarynyń utqyrlyǵy arqyly eńbek naryǵyn damytý» 3-baǵyty boıynsha áleýmettik jumys oryndaryn ashýǵa barlyǵy 120 adamǵa 18,530 mln teńge bólinip, josparlanǵan 5266,0 myń teńge tolyq ıgerildi. Segiz aıda 49 kelisimshart jasalyp, 37 jumys berýshige 76 adam jumysqa ornalastyryldy.
Jastar tájirıbesin uıymdastyrýǵa barlyǵy 477 adamǵa 141,978 mln teńge qaralyp, josparlanǵan 64,182 mln teńge ıgerildi. 174 kelisimshart jasalyp, 153 jumys berýshige 590 adam jastar tájirıbesi boıynsha joldandy.
Qoǵamdyq jumystardy uıymdastyrý úshin jergilikti bıýdjetten 1048 adamǵa 80,951 mln teńge bólinip, josparlanǵan 52,369 mln teńge ıgerildi. 101 kelisimshart jasalyp, 102 mekemege 1087 adam qoǵamdyq jumysqa jiberildi.
Aıta keteıik, segiz aıda bos jumys oryndarynyń alty jármeńkesi ótkizilip, josparlanǵan 900 myń teńge tolyq ıgerildi.
