Oralda 36 mln. teńgeni «tartyp áketý» qylmysy áshkerelendi
ORAL. QazAqparat - Ótken jyldyń 5 qyrkúıeginde Oral qalasyndaǵy Dostyq dańǵyly men Ǵumar Qarash kóshesiniń qıylysynda 1989 jylǵy S-ǵa tıesili 36 mln. teńgeni belgisiz bireýdiń tartyp alyp ketkeni jóninde polıtsııaǵa shaǵym túsken bolatyn. Osy qylmys ashyldy, dep habarlaıdy «QazAqparat» tilshisi.
BQO ishki ister departamentiniń baspasóz qyzmetinen túsken málimetke qaraǵanda, atalǵan oqıǵa QR QK 191-baby 4-bólimi boıynsha sotqa deıingi tergep-tekserýdiń biryńǵaı tizilimine tirkelgen edi. Ony tergeý barysynda zardap shegýshi S. men O. esimdi azamattyń tonaýdy ekeýara aldyn ala kelisip, ádeıi uıymdastyrǵany anyqtaldy.
Quqyq qorǵaý organyna jalǵan aqparat berip, tergep-tekserý barysyn burmalaýǵa nıettengen S. buǵan deıin Oral qalalyq sotynyń úkimimen 4 jylǵa bas bostandyǵynan aıyrylǵan bolatyn. Al onyń sybaılasy O-ny departamenttiń krımınaldyq polıtsııa basqarmasynyń qyzmetkerleri izdestirý sharalary nátıjesinde bıylǵy 1 sáýirde ǵana qolǵa túsirdi. Qazirgi ýaqytta 1982 jylǵy azamat Oral qalalyq ishki ister basqarmasynyń tergeý ızolıatoryna qamaldy. Tergeý amaldary jalǵasýda.
