Oralda 32 myńǵa jýyq oqýshy qashyqtan bilim alyp júr
Qala ákimi Abat Shynybekovtiń aıtýynsha, shaharda 51 mektepte barlyǵy 56249 shákirt oqyp jatyr.
Jyl saıyn oqýshylar sany artyp keledi. Mysaly, bıyl ótken jylǵydan 2 myńǵa kóbeıdi. Qalada 5 gımnazııa, 5 lıtseı jetkinshek urpaqty sapaly bilimmen qamtamasyz etýde.
Bıylǵy oqý jylynyń jyldaǵydan ózgeshe bastalǵany belgili. Qazirgi tańda barlyq sanıtarlyq talaptardy saqtaı otyryp, 1662 kezekshi synypta 21151 oqýshy bilim alýda.
Ákimniń sózine qaraǵanda, úıinde oqyp jatqan 32 myńǵa jýyq shákirtter týraly aıtqanda, kompıýter men ınternet, jaǵdaıy kótermeıtin otbasylar máselesi aldyńǵy orynǵa shyǵady.
Osy oraıda ótken oqý jylynyń tórtinshi toqsanynda qalalyq bıýdjet arqyly 350 kompıýter alynǵan bolatyn. Jańa oqý jylyna oraı QR Úkimeti rezervinen 500 noýtbýk pen 600 planshet alynyp, ata-analarǵa ýaqytsha paıdalanýǵa taratyldy.
Sondaı-aq jergilikti bıýdjet esebinen 1118 kompıýter, 46 noýtbýk, 19 monoblok alýǵa kelisimshart jasaldy. Qazirgi tańda sonyń 866 kompıýteri, 17 noýtbýk, 12 monoblok alynyp, mektepterge qoıyldy.
«Bir jaqsy jańalyq - buǵan deıin estetıkalyq baǵyttaǵy mektep gımnazııa jańa orynǵa kóshse, jýyrda Zachagan kentinde 900 oryndyq mektep ǵımaraty paıdalanýǵa beriledi. Onda №38 mektep-lıtseı ornalaspaq. Bul, bir jaǵynan, memlekettik shyǵyndardy azaıtýǵa múmkindik berse, ekinshiden, Zachagan kentinde turatyn mektep oqýshylaryna lıtseıde bilim alýǵa jaǵdaı jasalady. «Et kombınaty» shaǵynaýdanyndaǵy №33 mekteptiń eski ǵımaraty buzylyp, ornyna jańasy salynýda. Sonymen qatar oblys ákiminiń tikeleı qadaǵalaýymen jeke ınvestıtsııalar esebinen №31, №52 mektepter qurylysy bastaldy. «Jumyspen qamtý jol kartasy» memlekettik baǵdarlamasy aıasynda 1,8 mlrd teńgege №21, №25 jáne №45 mektepte kúrdeli jóndeý jumystary júrgizilýde», dedi Abat Abaıuly.
Eske sala keteıik, budan buryn BQO-da 380 mekteptiń 249-y shtattyq rejımde jumys jasap jatqanyn jazǵan bolatynbyz.