Oralda 22 jastaǵy kelinshekti óltirip, máıitin órtep jibergen turǵynǵa úkim shyqty

ORAL. QazAqparat – Oral qalalyq soty Temirlan Amanǵalıevke qatysty úkim shyǵardy, dep habarlaıdy QazAqparat tilshisi.

Qalalyq sottyń baspasóz qyzmeti málim etkendeı, T.Amanǵalıev QR QK 106-baby 3-bóligine (abaısyzda jábirlenýshiniń ólimine ákep soqqan qasaqana aýyr dene jaraqatyn keltirý) sáıkes aıypty dep tanyldy.

Ol segiz jylǵa bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge sottaldy.

Jábirlenýshiniń anasynyń azamattyq talap-aryzy ishinara qanaǵattandyryldy.

Sottalýshydan 159,9 myń teńge materıaldyq jáne 6 mln teńge moraldyq zalal óndirildi.

Sot talqysynda málim bolǵandaı, T.Amanǵalıev óz úıiniń kireberisinde jábirlenýshi, 22 jastaǵy Anastasııa Chernaıany tamaǵynan ustap, joǵary kóterip, basynan beton plıtaǵa urǵan. Jas áıel sol jerde esinen aıyrylyp, jan tapsyrǵan.

Sodan keıin sottalýshy qylmysyn jasyrý maqsatynda máıitti eski shkafqa salyp, qala syrtyna shyǵarǵan. Keıin qapqa salyp, basqa jerge aparyp, benzın quıyp, órtep jibergen.

Sot úkimi zańdy kúshine engen joq.

Marqumnyń sońynda kishkentaı qyzy qaldy.

Eske sala keteıik, budan buryn Oralda orman mańynan áıeldiń múrdesi tabylǵanyn, 22 jastaǵy qyzdy óltirgen kúdiktiniń ustalǵanyn jazǵan bolatynbyz.