Oralda 21 myńǵa jýyq adam baspana kezeginde tur
ORAL. QazAqparat – Oralda bıyl memlekettik baǵdarlamalar aıasynda kópqabatty 10 turǵyn úı salynady, dep habarlaıdy QazAqparat tilshisi.
Turǵyndar aldynda onlaın esep bergen qala ákimi Abat Shynybekovtiń aıtýynsha, sonyń jeteýi «Otbasy bank» arqyly berilse, úsheýi – arendalyq úıler. Barlyǵy 1226 páter turǵyndar ıgiligine berilmek.
Sonymen qatar jeke ınvestıtsııalar esebinen 72 myń sharshy metr turǵyn úı boı kótermek. Sonda turǵyn úı salý qarqyny bıyl da tómendemeıdi.
Qazirgi tańda shaharda 21 myńǵa jýyq adam turǵyn úı kezeginde tur.
Qala ákiminiń sózine qaraǵanda, turǵyndarǵa qolaıly bolýy úshin qurylysy bastalǵan 6 úıdiń birinshi qabatynda mektepke deıingi uıymdar, emhana, polıtsııa pýnkteri, saýda oryndary ornalasady.
«Biz 10 basym baǵytty aıqyndap aldyq. Ekinshiden, qala kóshelerin jóndeý jalǵasyp, avtobýs parki jańartylady. Byltyr bastalǵan 13 nysan boıynsha, ıaǵnı barlyǵy 16,7 km jol jóndeý bıyl márege jetedi. Oǵan qosa jalpy uzyndyǵy 44 shaqyrym bolatyn 33 kósheni kúrdeli jóndeý úshin qujattama daıyndalýda. Memlekettik qoldaý arqyly jolaýshy tasymaldaýshy kásiporyndar 100-ge jýyq jańa avtobýs satyp alýdy josparlap otyr», - dedi Abat Shynybekov.
Sondaı-aq aýyz sýmen qamtý, aýlalardy, tynymbaqtar men qoǵamdyq oryndardy abattandyrý, qalany jaryqtandyrý men turǵyn úı keshenin jańǵyrtý jáne basqa baǵyttar boıynsha tıisti jumystar jasalatyn bolady.
