Oralda 200-ge jýyq jas sarbaz Ulttyq ulan qataryna qosyldy

QR Ulttyq ulany «Batys» óńirlik qolbasshylyǵynyń baspasóz qyzmetinen málim etkenindeı, bıylǵy shaqyrylymmen áskerı bólim qataryna Almaty, Aqtóbe, Atyraý jáne Mańǵystaý oblystarynan kelgen jastar qosyldy. Birneshe apta ishinde olar bastapqy áskerı daıarlyqtan ótip, saptyq jáne atys daıarlyǵyn meńgerip, áskerı jarǵynyń talaptaryn ıgerdi. 

Saltanatty rásimge Qazaqstannyń ár óńirinen arnaıy kelgen 500-ge jýyq ata-ana men jaqyn týystary qatysty. Perzentteriniń áskerı forma kıip, ant qabyldap turǵan sátin kózben kórý olar úshin erekshe maqtanysh ári tolqynysqa toly áserli sát boldy. Áskerı orkestrdiń súıemeldeýimen Memlekettik Tý kóterilip, Ánuran shyrqalǵanda, sap túzegen sarbazdardyń júzinen senimdilik pen jaýapkershilik aıqyn baıqaldy.

Almaty qalasynan kelgen sarbazdyń anasy Maral Qurmantaıqyzy bul kúndi ómirindegi eń qýanyshty sátterdiń biri ekenin aıtty.

— Búgin ulymnyń áskerı ant qabyldaý rásimine qatysyp, onyń Otan qorǵaýshylar qataryna qosylǵanyn óz kózimmen kórdim. Bul — árbir ata-ana úshin úlken maqtanysh. Ulttyq ulandaǵy áskerı qyzmet ulyma tártipti, jaýapkershilikti jáne elge degen súıispenshilikti qalyptastyrady dep senemin. Elimiz aman, aspanymyz ashyq bolsyn, — dedi ol.

Jas sarbaz Erbol Ǵaınıbekuly úshin de bul kún ómirindegi jańa kezeńniń bastaýy boldy.

— Búgin men úshin erekshe kún. Áskerı ant qabyldaý arqyly halqymyzdyń senimin aqtaýǵa, elimizdiń tynyshtyǵyn qorǵaýǵa ant berdik. Bizge júktelgen mindettiń salmaǵyn jaqsy túsinemiz. Áskerı qyzmet bizdi shyńdap, naǵyz azamat retinde qalyptastyrady dep senemin, — dedi jas jaýynger.

Áskerı ant qabyldaǵannan keıin sarbazdar tolyqqandy áskerı qyzmetke kirisedi. Aldaǵy bir jyl ishinde olar qoǵamdyq qaýipsizdikti qamtamasyz etýge, quqyqtyq tártipti saqtaýǵa jáne turǵyndardyń tynyshtyǵyn qorǵaýǵa baǵyttalǵan jaýyngerlik mindetterdi oryndaıdy.

Eske sala keteıik, budan buryn Oralda ulandyqtardyń 101 jastaǵy maıdangerdi quttyqtaǵanyn jazǵan edik.