Oralda 20 jastaǵy boıjetken kópirden sekirip ketti
ORAL.QazAqparat – Oralda kópirden ózenge sekirip ketken 20 jastaǵy qyzdy polıtsııa qyzmetkeri qutqaryp qaldy, dep habarlaıdy QazAqparat tilshisi.
BQO polıtsııa departamentiniń baspasóz hatshysy Bolatbek Belgibekovtiń aıtýynsha, oqıǵa búgin saǵat shamamen 13.00-de «Dınamo» bazasy aýdanynda Shaǵan ózeninen ótetin kópir tusynda boldy.
Qyz kópirden sekirgen sátte BQO polıtsııa departamenti arnaıy bólimshesiniń qyzmetkeri birinshi bolyp jetip, qutqaryp úlgergen. Oqıǵa ornyna birneshe mınýttan keıin BQO TJ departamenti jedel qutqarý jasaǵynyń úsh qyzmetkeri kelip, 1999 jylǵy qyzdy jedel járdem brıgadasyna tapsyrǵan.
Osylaısha jıyrma jastaǵy qyz aman qaldy.
«Meniń ornymda basqa bireý bolsa da, sóıter edi. Men jaı ǵana azamattyq boryshymdy oryndadym», - dedi polıtsııa qyzmetkeri.
Aıta keteıik, sol mezette ózendegi sý temperatýrasy 8-9 gradýs bolǵan.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, jedel járdem saǵat 13.05-te shaqyryldy. Brıgada bes mınýttan keıin jetti.
Aldyn ala málimet boıynsha, 20 jastaǵy qyz jabyq mı jaraqatyn alǵan, mıy shaıqalǵan.
