Oralda 2 turǵyn úı paıdalanýǵa berildi
ORAL. QazAqparat - Búgin Oralda qala kúnine oraı qos birdeı kóp qabatty turǵyn úı paıdalanýǵa berildi, dep habarlaıdy «QazAqparat» tilshisi.
Onyń biri Depovskaıa kóshesinde apatty úıdiń ornyna boı kóterdi. Toǵyz qabatty 90 páterlik úı memlekettik-jekeshelik áriptestik aıasynda salyndy. Buǵan «Bolashaq-T» JShS 683,478 mln teńge jumsady. Al aýlany abattandyrý jergilikti bıýdjet esebinen júrgizildi. Mundaǵy 16 páter apatty úıde turǵandarǵa berildi. Qalǵan 74-i «Turǵynúıqurylysjınaqbanki» AQ salymshylary men páter qunyn tóleýge kelisken turǵyndarǵa beriledi.
Búgin sondaı-aq Zachagan kentindegi Oral-Atyraý men Oral-Sarytaý joldary arasyndaǵy jańa shaǵynaýdanda 9 qabatty, 180 páterlik úı iske qosyldy.
Qos úıdiń de paıdalanýǵa berý rásimine qatysqan oblys ákimi Altaı Kólginov Elbasy tapsyrmasyna sáıkes óńirde turǵyn úı qurylysy qarqyn alyp otyrǵanyn jetkizdi. Apatty úılerdiń ornyna jańalaryn salý memlekettik-jekeshelik áriptestik negizinde alǵash ret qolǵa alynyp otyrsa, Zachagandaǵy kezekte turǵandar men «Turǵyn úı qurylys jınaq banki» AQ salymshylaryna arnalǵan turǵyn úı «Nurly jol» jáne 2020 jylǵa deıingi óńirlerdi damytý baǵdarlamasyna sáıkes salyndy. Qurylysty «Ýral Avto» JShS júrgizse, merdigeri - «Bolashaq-T» JShS kompanııasy. «Bul ǵımarat úı qurylysy kombınaty júıesi boıynsha salyndy. Qýat únemdeıtin úı qazirgi zamanǵy barlyq talaptarǵa saı keledi. Munda sondaı-aq elektrondy PIK, beınebaqylaý júıesi jumys jasaıtyn bolady.
Bıyl «Nurly jer» baǵdarlamasy aıasynda 14 kóp qabatty turǵyn úı paıdalanýǵa beriledi. Oǵan qosa oblystyń segiz aýdanynda úıler salynýda. Barlyǵy bıyl 1600 páter turǵyndar ıgiligine aınalmaq. Aldaǵy jyly 16 kóp qabatty turǵyn úıdi (2700 páter) salý kózdelýde. Oblys ortalyǵynda qyryqtan astam apatty, 200-deı eski úıler bar, olar da jańartylatyn bolady», - dedi óńir basshysy.
