Oralda 2 myńnan asa adam kóktaıǵaq saldarynan jaraqat aldy

ORAL. QazAqparat – Oralda qys túskeli beri 2370 adam kóktaıǵaq saldarynan jaraqat aldy. Bul týraly oblys ákimi Ǵalı Esqalıevtiń tóraǵalyq etýimen ótken qalany abattandyrý, jaryqtandyrý, sáýlettik kelbetin jaqsartý, qar men muzdan tazalaý máselelerine arnalǵan jıynda aıtyldy, dep habarlaıdy QazAqparat tilshisi.

BQO densaýlyq saqtaý basqarmasynyń málimeti boıynsha jeltoqsan, qańtar jáne aqpannyń 15-ine deıin kóktaıǵaq saldarynan zardap shekken 1242 adam oblystyq kópbeıindi aýrýhanaǵa júgingen.

Sondaı-aq oblystyq kópbeıindi balalar aýrýhanasyna 542, qalalyq kópbeıindi aýrýhanaǵa 586 adam túsken.

Jıynda oblys ákimi apparaty basshysynyń orynbasary Medet Aıdynǵalıev qala turǵyndarynan jaıaý júrginshi joldarynyń tazalanbaıtyny jóninde shaǵymnyń jıi túsetinin jetkizdi. Kemshilikter óńir basshysynyń tapsyrmasyna sáıkes júrgizilgen monıtorıng barysynda anyqtalǵan. Mysaly, ortalyqtyń ózinde N.Nazarbaev dańǵyly boıyndaǵy keıbir dúkenderdiń aldynda qatqan muzdyń qalyńdyǵy 10 santımetrge deıin jetedi.

Oral qalasynyń ákimi Abat Shynybekovtiń málim etkenindeı, shaharda qar shyǵarý jumystarymen 180 tehnıkasy bar «Jaıyq taza qala» JShS aınalysady.

Atalmysh máselege oraı oblys ákimi qala tazalyǵyna baılanysty jaýakershilik pen talapty kúsheıtýdi tapsyrdy.

«Ortalyqtaǵy jaǵdaı osyndaı bolǵanda, qalanyń shetkeri aýdandary jóninde aıtý qıyn. Qalanyń sanıtarlyq tazalyǵyna jaýapty mekemeler jumysy shıraýy tıis. Sonymen qatar eger mekemeler, túrli nysandar aýmaǵy qar men muzdan qar men muzdan ýaqtyly tazartylmasa, onda basshylar men kásipkerlerge aıyppul salýǵa deıin barý kerek. Sondaı-aq kóp qabatty úılerdiń aýmaǵyn tazartýǵa sol úılerde turatyn turǵyndardy tartý qajet», dedi Ǵ.Esqalıev.