Oralda 2 myńǵa jýyq páterli kópqabatty turǵyn úıler qurylysy bastalady - BQO ákimi

ORAL. QazAqparat - Bıyl Oral qalasynda 2 myńǵa jýyq páterli kópqabatty turǵyn úıler qurylysy bastalady. Bul týraly búgin oblys aktıvi jıynynda óńir basshysy Altaı Kólginov málim etti, dep habarlaıdy «QazAqparat» tilshisi.

Onyń aıtýynsha, aýdandarda sondaı-aq bir jáne eki qabatty 140 úı salynbaqshy.

Memleket basshysy óziniń «Áleýmettik 5 bastamasy» arqyly taǵy da turǵyndar úshin jańa múmkindikterge jol ashyp otyr.

Prezıdenttiń usynysyna sáıkes jańa «7-20-25» turǵyn úı baǵdarlamasy qabyldanyp, sol arqyly óńirde myńdaǵan turǵyn baspanaǵa qol jetkizýge múmkindik alady. ıAǵnı, ıpoteka qazirgiden eki ese tómendetilip, 7 protsentten aspaıtyn bolady. Alǵashqy jarna da burynǵysynan eki ese azaıtylyp, 20 protsent bolmaq.  Al aı saıynǵy tólem azamattardyń qaltasyna aýyrtpalyq túsirmes úshin 25 jylǵa deıin sozyp tóleýge múmkindik beredi.

«El erteńi - jastar» deıtin bolsaq, bul baǵytta elimizde qyrýar jumystar atqarylýda. Jastarymyzdyń shet elderde de, óz memleketimizde de alańsyz bilim alyp, qalyptasýyna barlyq jaǵdaı jasalǵan. Elbasy óziniń «Áleýmettik 5 bastamasynda» elimizde 159 myń stýdent grantpen bilim alyp jatqanyn atap ótti. Batys Qazaqstandaǵy eki memlekettik ýnıversıtette 3 135 stýdent grant arqyly bilim alýda. Memleket basshysynyń usynysyna sáıkes taǵy 20 myń bilim granty bólinetin boldy. Ýnıversıtetter bul ózgeristerge kadrlyq, materıaldyq-tehnıkalyq jaǵynan daıyn bolýy qajet.

«Áleýmettik 5 bastamada» joǵary oqý oryndary men kolledjderdiń stýdentterin jataqhanamen qamtamasyz etý máselesiniń ózektiligi ashyq aıtyldy. Bizdiń óńirde de jataqhanaǵa muqtaj stýdentter joq emes. Búgingi tańda 2250 stýdent jataqhanaǵa muqtaj. Joǵary oqý oryndarynyń 500, kolledjderdiń 1750 stýdenti týystarynda nemese páter jaldap turady. Prezıdenttiń bastamasyna sáıkes jataqhana qurylysyna kóbirek kóńil bólip, memlekettik-jekeshelik áriptestik qaǵıdasynda jumystanýymyz qajet. Biz orta jáne kásiptik oqý oryndardyń stýdentterine arnalǵan 500 oryndyq jataqhana salýdy josparlap otyrmyz. Bıyl jobalyq-smetalyq qujattamasyn daıyndaıtyn bolamyz», dedi Altaı Kólginov.

Aıta keteıik, óńirde «Turǵyn úı qurylys jınaq bankiniń» salymshylary 56 myń, al baspana kezeginde turǵandar sany  22 myńnan asty. Prezıdent qabyldaǵan «Nurly jer» baǵdarlamasy oblystaǵy qurylys salasynyń qarqyn alýyna oń septigin tıgizýde. Sońǵy eki jyl ishinde 3 myń adam óz úıiniń kiltterin aldy. Onyń ishindegi 700 otbasy - jetim-jesirler, ardagerler, múmkindigi shekteýli jandar men basqa da áleýmettik toptar ókilderi.

2017 jyly qurylystaǵy ósim 42 protsentti qurady.