Oralda 2 kólik soqtyǵysyp, úsh adam jaraqat aldy
ORAL. QazAqparat - Búgin Oralda qos avtokólik soqtyǵysyp, úsh adam jaraqat aldy, dep habarlaıdy QazAqparat tilshisi.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, oqıǵa «Dınamo» bazasy tusynda, Shaǵan ózeninen ótetin kópir mańynda bolǵan.
Jedel járdem stansasyna shaqyrtý saǵat 17.44-te túsken.
Jol apaty saldarynan 1996 jylǵy qyz ben 1991 jylǵy azamat aldyn ala málimet boıynsha, jabyq bas-mı jaraqatyn alǵan. 1994 jylǵy azamatshanyń ish qurylysyna zaqym kelgen. Olardyń bári de oblystyq aýrýhanaǵa jetkizildi.
Oqıǵa kýágerleriniń sózine qaraǵanda, sol mańdaǵy jóndeý ornynan shyqqan «Lada Prıora» avtokóligi taǵy bir kólikke baryp soǵylǵan.
Jol apaty saldarynan qalada kólik keptelisi boldy. Qazirgi kezde oqıǵanyń jaı-japsary anyqtalyp jatyr.
