Oralda 2 kólik soqtyǵysyp, birneshe adam aýrýhanaǵa jetkizildi
ORAL. QazAqparat - Oralda eki avtokólik soqtyǵysyp, birneshe adam aýrýhanaǵa jetkizildi, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, oqıǵa búgin shamamen saǵat 08.15-te Zachagan kentinde Saratov joly boıynda «Kondensat» janar-jaǵar maı stansasy tusynda boldy.
Matiz ben Volkswagen markaly avtokólikteri soqtyǵysty. Sonyń saldarynan Volkswagen avtokóliginde otyrǵan úsh jolaýshy men Matiz júrgizýshisi túrli dene jaraqattarymen aýrýhanaǵa jetkizildi.
Aldyn ala málimet boıynsha joldyń kóktaıǵaq bolýyna jáne nashar bóligine baılanysty Matiz avtokóligi qarsy betke shyǵyp ketken.
Oblystyq densaýlyq saqtaý basqarmasynyń naqtylaýynsha, mıy shaıqalǵan degen kúdikpen 11 jasar er bala men mańdaı tusy kógergen16 jasar qyz oblystyq kópbeıindi balalar aýrýhanasyna jetkizildi. Qabyrǵasy synǵan 1960 jylǵy jáne mıy shaıqalǵan degen kúdikpen 1990 jylǵy áıelder qalalyq kópbeıindi aýrýhananyń hırýrgııalyq bólimshesine jatqyzyldy. 1960 jáne 1989 jylǵy er adamdar aýrýhanaǵa jatýdan bas tartty.
