Oralda 2 adam taksısti uryp, avtokóligin aıdap ketken
ORAL. QazAqparat – Oralda eki kúdikti taksısti uryp, avtokóligin aıdap ketken, dep habarlaıdy QazAqparat tilshisi.
BQO polıtsııa departamentiniń baspasóz qyzmeti málim etkenindeı, oqıǵa «Juldyz» shaǵynaýdanynda boldy.
Belgisiz ekeý 24 jastaǵy taksıske kúsh kórsetip, onyń «Chevrolet Aveo» avtokóligin aıdap ketken. Sóıtip oǵan 1,5 mln teńge zalal keltirgen.
Osy qylmysqa kúdikti retinde Oral qalasynyń 21 jastaǵy eki turǵyny ustalyp, ýaqytsha oqshaýlaý ızolıatoryna qamaldy.
Avtokólikti olar Atyraýda satyp jibermekshi bolǵan. Kólik Atyraýdan tabylyp, ıesine qaıtaryldy.
Qazirgi kezde QR QK 192-baby 2-bóligine (qaraqshylyq) sáıkes sotqa deıingi tergeý amaldary júrgizilýde.
