Oralda 2,3 mlrd. teńgege kópir qaıta salynbaqshy
ORAL. QazAqparat - Búgin oblys ákimi Altaı Kólginov Oral qalasynda lokomotıv deposy mańyndaǵy kópirdi buzý barysymen tanysty, dep habarlaıdy «QazAqparat» tilshisi.
Kópir qurylysy «QPO b.v.» kompanııasy esebinen júrgizilýde. Joba quny - 2,3 mlrd. teńge. Bas merdiger «KA-Stroı LTD» JShS bıylǵy 1 naýryzda bastalǵan kópirdi bólshekteýdiń 95 paıyzyn atqaryp bola kelgen. Kópir qurylysynyń eki jylǵa eseptelýi osy jermen temirjoldyń ótetindiginde. Sondyqtan barlyq jumysty «Qazaqstan temir joly» kompanııasymen kelisip jasaýǵa týra keledi. Kóp uzamaı Oral-Astana jáne Oral-Almaty baǵytynda «Tulpar-Talgo» júrdek poıyzy iske qosylǵan kezde jumys ýaqyty odan da qysqara túsedi.
Ýchaske bastyǵy Baqyt Bekturǵanovtyń sózine qaraǵanda, kópirdi buzý jumysy on kún ishinde bitpek. Jańa kópir qurylysy úshin qazirdiń ózinde temirbeton qurylymdarynyń 30 paıyzy ákelingen, bul jumys ta jalǵasýda. Qurylys úshin paıdalanylatyn materıaldardyń bári de - qazaqstandyq ónimder. Kúni búgin munda 13 arnaıy tehnıka men 39 qurylysshy jumyldyrylǵan.
Oblys basshysy qurylys eki jylǵa josparlanǵanymen, ony erterek aıaqtaý kerektigin jetkizdi. Óıtkeni kópir qala ortalyǵynda ornalasqandyqtan, onyń uzaq jóndelýi kólik qozǵalysyna qıyndyq keltiretini anyq. Kópirdiń tirek baǵanalary men negizgi tósemderi erterek salynsa, qysqy maýsymnan keıin qatqyl tabandy jol tartýdy da mezgilinde bastaýǵa bolady. Árıne, sapany da esten shyǵarmaý kerek.
Aıta keteıik, jobaǵa sáıkes kópirdiń eni tórt jolaqty avtokólik qozǵalysyna laıyqtalyp, 8 metrden 19 metrge deıin keńeıtiledi. Eki jaǵynda júrginshi joly bolady.
