Oralda 19 jastaǵy stýdent qyz joǵalyp ketti
ORAL. QazAqparat - Oralda osydan 20 shaqty kún buryn joǵalyp ketken Gúldana Turjanova áli tabylmaı jatyr, dep habarlaıdy QazAqparat tilshisi.
On toǵyz jastaǵy Gúldana 21 qazan kúni úıinen shyǵyp ketip, sodan qaıtyp oralmaǵan.
Anasy Albınanyń sózine qaraǵanda, qyzymen keshke birge tamaqtanǵan. Tańerteń turǵanda, Gúldana joq bolǵan. Aqsha, qujat jáne basqa da jeke zattaryn ózimen birge alyp ketpegen. Ol osyǵan deıin úıinen eskertýsiz shyǵyp kórmegen.
Gúldana Turjanova - J.Dosmuhamedov atyndaǵy pedkolledjdiń 4-kýrs stýdenti. Ustazdarynyń aıtýynsha, sabaǵy jaqsy.
On toǵyz kúnnen beri Gúldanany izdestirý jumystary júrip jatqanymen, ázirge eshqandaı nátıje bolmaı tur. BQO polıtsııa departamentinen alynǵan málimetke qaraǵanda, qazirgi kezde bul oqıǵa boıynsha is Abaı polıtsııa bóliminde qaralýda.
