Oralda 155 mln teńgelik memlekettik satyp alý kezinde jalǵan bank kepildigi qujaty anyqtaldy
ORAL. KAZINFORM — Kompanııa Oral qalasyndaǵy aǵashtardy kútip ustaý konkýrsyna qatysqan. Jalǵan qujatty BQO boıynsha Ekonomıkalyq tergep-tekserý departamenti anyqtady.
BQO boıynsha Ekonomıkalyq tergep-tekserý departamentiniń habarlaýynsha, Memlekettik satyp alýlar portalyna web-monıtorıng júrgizildi. Sol kezde Oral qalasyndaǵy aǵashtardy kútip-ustaý qyzmetterin usynǵan «E» JShS-iniń qujattary tekserildi. Kompanııa quny 155 mln teńge bolatyn memlekettik satyp alý konkýrsynda bank kepildiginiń jalǵan qujatyn usynǵany belgili boldy.
— «E» JShS-i satyp alý rásimine qatysý jáne memlekettik tapsyrysty alý úshin qujattar toptamasyn usyndy. Onda bank kepildigi qujaty da bar. Tekserý barysynda atalǵan kepildikti ol banktiń bermegeni anyqtaldy. Osy derek boıynsha Batys Qazaqstan oblysy boıynsha Ekonomıkalyq tergep-tekserý departamenti Oral qalasynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimine tıisti hat joldady.
Nátıjesinde zańsyz jasalǵan shart buzylyp, kompanııa josyqsyz qatysýshylardyń tizilimine engizildi. Merzimi — eki jyl, — dep habarlady BQO boıynsha Ekonomıkalyq tergep-tekserý departamenti.
Eske salsaq, BQO-da moratorııge qaramastan 61,4 mln teńgege kólik satyp alýǵa áreket jasalǵan. Buzýshylyqty Batys Qazaqstan oblysy Karatóbe aýdanynyń prokýratýrasy anyqtady.
