Oralda 1500 oryndyq mádenıet úıi salynady
ORAL. QazAqparat - Oral qalasyndaǵy jańa alańda 1500 oryndyq mádenıet úıi salynatyn bolady. Bul týraly búgin oblys ákimi Altaı Kólginov málim etti, dep habarlaıdy «QazAqparat» tilshisi.
Oblys basshysynyń aıtýynsha, qazirgi kezde astanalyq mekeme jobalaý-smetalyq qujattamasyn jasaýmen aınalysýda. Aq Jaıyq óńirinde mádenıet salasy damyp kele jatqanymen, oblys ortalyǵynda laıyqty mádenıet úıi joq. Bul týraly túrli kezdesýlerde turǵyndar da aıtyp júr. Sondyqtan qurylysy bıyl bastalýy josparlanyp otyrǵan mádenıet úıinde túrli aýqymdy sharalardy ótkizetin keń kontsert zaly da bolmaq.
Taǵy bir jańalyq, oblys ortalyǵynda bes juldyzdy otel salý oılastyrylýda. Onyń jobasyn ıtalıandyq ınvestorlar ázirledi. Qazirgi tańda Oraldaǵy qonaqúılerdiń jaıy kóńil qanaǵattandyrmaıdy. Sondyqtan jetekshi ıtalıandyq dızaınerlerdiń qatysýymen salynatyn jańa qonaqúı qyzmet kórsetýdiń sapasyn da arttyratyn bolady.
Bıyl «Oral» áýejaıynyń termınalyn qaıta qurý josparlanyp otyr. Ábden eskirgen ǵımaratty jańartpasa bolmaıdy. Qazirgi zamanda áýe joldary mańyzdy ról atqarady. Sondyqtan termınaldyń jańǵyrtylýy bıznes ahýalynyń odan ári jaqsarýyna, týrızmniń damýyna, sheteldik ınvestıtsııalardyń kelýine áser etedi. Onyń ústine ótken jyly Frankfýrt pen Máskeýge, Atyraý men Aqtaýǵa reıster ashylyp, jolaýshylar aǵyny arta tústi. Eýropa men Azııanyń túıisken jerinde, qolaıly aýmaqta ornalasqan bul áýejaıdyń bolashaǵy zor.
Aıta keteıik, bıyl sondaı-aq avtokólik ıelerine qyzmet kórsetetin arnaıy ortalyq ta ashylatyn bolady.
