Oralda 150 páterlik turǵyn úı paıdalanýǵa berildi
ORAL. KAZINFORM — QR Memlekettik rámizderi kúni Oral qalasynda 150 páterlik turǵyn úı paıdalanýǵa berildi.
Onyń 104 páteri «Otbasy bank» AQ arqyly Turǵyn-úı kommýnaldyq ınfraqurylymdy damytýdyń 2023-2029 jyldarǵa arnalǵan tujyrymdamasy aıasynda baspanaǵa muqtaj retinde kezekte turǵan áleýmettik osal toptaǵylar, kópbalaly januıalar, memlekettik qyzmetshiler, áskerıler jáne ózge de sanattaǵy otbasylarǵa tabystaldy. Jańa qonys ıelerin oblys ákimi Narıman Tóreǵalıev quttyqtady.
— Memleket basshysy Qasym-Jomart Kemeluly Toqaevtyń tikeleı tapsyrmasymen óńirimizde turǵyn úı qurylysy qarqyn aldy. Sonyń ishinde «Aqjaıyq» shaǵynaýdanynyń áleýeti zor. Munda ınjenerlik jelilerdi tarttyq, jol saldyq. Oral qalasynyń ortalyǵyna qatynasty jeńildetý úshin kópir salýdy qolǵa aldyq. Keleshekte 1500 oryndyq mektep, balabaqsha, aýrýhana, sport keshenin salamyz. Bul — qur ýáde emes, júıeli josparǵa saı atqarylyp jatqan naqty ister. Basty maqsat — halyqtyń ómir súrý sapasyn arttyrý, — dedi aımaq basshysy.
Oblys ákimi jańa qonys ıelerin Memlekettik rámizder kúnimen de quttyqtap, osyndaı ıgilikti sharalar jas urpaqtyń boıynda otansúıgishtik sezimdi arttyryp, sapaly bilim alyp, adal eńbek etýge qanattandyratynyna senim bildirdi.
Aıta keteıik, Oral qalasynda 27 myń adam turǵyn úı kezeginde tur. Olardy baspanamen qamtý baǵytynda bıyl 1800 páterlik 20 kópqabatty turǵyn úı salý josparlandy.
