Oralda 144 páterlik turǵyn úı paıdalanýǵa berildi

ORAL. QazAqparat - Búgin Oral qalasyna qarasty Zachagan kentinde 144 páterlik, toǵyz qabatty turǵyn úı paıdalanýǵa berildi, dep habarlaıdy QazAqparat tilshisi.

Táýelsizdiktiń torqaly toıy qarsańynda turǵyndardy jańa qonystarymen quttyqtaǵan oblys ákimi Altaı Kólginovtiń atap ótkenindeı, elimiz egemendik alǵannan beri eleýli ózgerister bolyp, halqymyzdyń ál-aýhaty jyl sanap jaqsarýda. Elbasymyzdyń turǵyndardy qoljetimdi baspanamen qamtý jónindegi tapsyrmasy da oıdaǵydaı oryndalýda. Jańa úılerdi berý jyl aıaǵyna deıin jalǵasady.

 

«Nurly jol» baǵdarlamasyna sáıkes respýblıkalyq bıýdjetten bólingen 1,1 mlrd. teńgege salynǵan atalmysh úıdiń kólemi - 10 myń sharshy metr. «SV Plıýs» JShS turǵyn úıdi eki jylda salyp bitirdi. Turǵyn úıdegi 144 páterdiń teń jartysy kezekte turǵan azamattarǵa berilse, qalǵanyn «Turǵynúıqurylysjınaqbanki» salymshylary ıelendi.

Saltanatty jaǵdaıda kóp balaly jáne jas otbasylarǵa jańa páter kiltteri tabys etilip, olar qamqorlyǵy úshin Elbasyna rızashylyqtaryn bildirdi.

Turǵyndardyń qýanyshyna ortaqtasqan óńir basshysy olardyń birqatarynyń jańa páterine kirip, qutty bolsyn aıtýdy da umytqan joq.