Oralda 13 jastaǵy qyzdy zorlaǵandarǵa qatysty sot úkimi zańdy kúshine endi
ORAL. KAZINFORM – Oral qalasynda 13 jastaǵy qyzdy zorlaǵan R-ǵa, sondaı-aq kámeletke tolmaǵan M., A., N. jáne Q.-ǵa qatysty qylmystyq is prokýrordyń apellıatsııalyq shaǵymy boıynsha BQO sotynyń qylmystyq ister jónindegi apellıatsııalyq sot alqasynda qaraldy.
Sottalýshylardyń barlyǵy QR QK 293-baby 4-bóligine (zorlaý, ıaǵnı aldyn ala sóz baılasý arqyly adamdar tobymen jábirlenýshiniń dármensiz kúıin paıdalanyp, jas balaǵa qatysty jynystyq qatynas jasaý) sáıkes aıypty dep tanylǵan bolatyn.
Oǵan qosa A. men N. QR QK 293-baby 2-bóligi 1-tarmaǵy (aldyn ala sóz baılasý arqyly adamdar tobymen buzaqylyq jasaý), Q. QR QK 200-baby 1-bóligi (avtomobıldi urlaý maqsatynsyz aıdap ketý), sondaı-aq 188-baby 3-bóligi 3-tarmaǵy (kólik quralyna zańsyz kirýmen bótenniń múlkin jasalǵan urlyq), A. jáne M. QR QK 188-baby 3-bóligi 3-tarmaǵy (kólik quralyna zańsyz kirýmen adamdar tobynyń aldyn ala sóz baılasýlary arqyly jasalǵan urlyq) boıynsha aıyptaldy. Sonymen qatar A. jábirlenýshiniń dármensiz kúıin paıdalanyp, jas qyzǵa qatysty seksýaldyq sıpattaǵy ózge de áreketterdi (QK-niń 121-baby 4-bóligi) jasaǵan.
BQO qylmystyq ister jónindegi mamandandyrylǵan aýdanaralyq sotynyń úkimimen R. 20 jyl merzimge bas bostandyǵynan aıyrylsa, kámeletke tolmaǵan M. men N.-ǵa qylmystardyń jıyntyǵy boıynsha túpkilikti 7 jyl 6 aıǵa, A. jáne Q.-ǵa 8 jylǵa bas bostandyǵynan aıyrý jazasy taǵaıyndalǵan edi.
BQO sotynyń qylmystyq ister jónindegi apellıatsııalyq sot alqasynyń 18 qazandaǵy sheshimimen M.,A.,N.,jáne Q.-ǵa qatysty taǵaıyndalǵan jazalar bóliginde ózgertildi. QK-tiń 58-baby 4, 5-bóligi negizinde qylmystardyń jıyntyǵy boıynsha M., jáne N-ǵa túpkilikti 7 jyl 7 aıǵa, al Q.-ǵa 8 jyl 1 aıǵa bas bostandyǵynan aıyrý jazasy taǵaıyndaldy. A.-ǵa qatysty túpkilikti taǵaıyndalǵan jazaǵa QK 58-baby 4, 5-bóligi qoldanyldy dep esepteldi.
«Úkimniń qalǵan bóligi ózgerissiz qaldyryldy. Prokýrordyń apellıatsııalyq ótinishi jartylaı qanaǵattandyryldy, apellıatsııalyq shaǵymdar qanaǵattandyrýsyz qaldyryldy. Apellıatsııalyq qaraý barysynda sot alqasymen apellıatsııalyq shaǵymdardyń ýájderi rastalmady, onyń ústine birinshi satydaǵy sotpen materıaldyq quqyq normalarynyń durys qoldanylmaǵandyǵy anyqtaldy. Sol sebepti M., N., jáne Q.,-ǵa qatysty taǵaıyndalǵan jaza mólsherin kóbeıtti. Úkim zańdy kúshine endi», dep habarlady BQO sotynan.
Eske sala keteıik, budan buryn Oral qalasynda 13 jastaǵy qyzdy zorlaǵandardyń sottalǵanyn jazǵan bolatynbyz.
