Oralda 12 jastaǵy qyzdyń aýrýhanada kóz jumýyna baılanysty tekserý júrgizilip jatyr
ORAL. KAZINFORM — Oral qalasynda oblystyq juqpaly aýrýlar aýrýhanasynda 12 jastaǵy Dámeli Abdrahmanova qaıtys boldy.
Týystarynyń sózine qaraǵanda, qyz bala aýrýhanaǵa 28 maýsym kúni túsken. Oǵan irińdi baspa dıagnozy qoıylyp, palataǵa jatqyzylǵan. Kelesi kúni jaǵdaıy kúrt nasharlap, kóz jumǵan.
Týystary qyzdyń ólimine medıtsına qyzmetkerleriniń salǵyrttyǵy men jaıbasarlyǵy sebep bolǵan dep esepteıdi.
Osy qaıǵyly oqıǵaǵa baılanysty Kazinform tilshisi BQO densaýlyq saqtaý basqarmasyna arnaıy saýal joldaǵan edi.
Basqarma málimetine qaraǵanda, qazirgi kezde tekserý júrgizilip jatyr.
— Sot-medıtsınalyq saraptama áli aıaqtalmaǵandyqtan, ólimniń naqty sebebi anyqtalǵan joq. Resmı aqparat sot-medıtsınalyq saraptama qorytyndysy shyqqannan keıin beriletin bolady, — delingen jaýapta.
Eske sala keteıik, budan buryn BQO-daǵy aýrýhanada lıft jumys istemeýine baılanysty naýqastarǵa qıyn bolyp turǵanyn jazǵan edik.
