Oralda 101 mln teńgege shybyn-shirkeıdi ýlaý jumystary júrgizilmek

ORAL. QazAqparat – Oral qalasy aýmaǵynda shybyn-shirkeıge qarsy 101 mln teńgege ýlaý jumystary júrgizilmek, dep habarlaıdy QazAqparat tilshisi.

BQO energetıka jáne turǵyn úı-kommýnaldyq sharýashylyq basqarmasy turǵyn úı sharýashylyǵyn jańǵyrtý jáne gazdandyrý bóliminiń basshysy Murat Qonysbaevtyń óńirlik kommýnıkatsııalar qyzmeti alańynda ótken brıfıngte málim etkenindeı, dezınsektsııa jumystaryn merdiger «Magtoksın» JShS atqarady.

Onyń sózine qaraǵanda, osy maqsatqa jergilikti bıýdjetten 101 mln teńge bólinip, barlyǵy 13 myń gektar jerdi óńdeý josparlanyp otyr.

Jumystar eki kezeńmen júrgiziledi. Birinshi kezeńde dernásilderge qarsy, ekinshisinde masalar qanattanǵan kezde ýlaý jumysy atqarylady. Bıyl buǵan Dımıgran jáne Tsıpaks hımııalyq preparattary qoldanylatyn bolady.

«Bıyl jyldaǵydan góri aýa raıy kúrt jylyndy. Qardyń erýi saldarynan kólshik sýlar kóp bolmaqshy. Bul masalardyń kóbeıýine ákep soqtyrady. Sondyqtan dezınsektsııa jumystaryna daıyndyq erte bastaldy. Qazirdiń ózinde merdiger mekemeniń entomolog mamandary shalshyq sýlarda dernásilderdiń paıda bolýyna qatysty tekserý jumystaryn júrgizýde», dedi M.Qonysbaev.

Bul maqsatqa 2021 jyly – 93,3 mln, ótken jyly 97 mln astam teńge qarastyrylǵan edi.

«Magtoksın» JShS dırektorynyń orynbasary Danııar Bazarbaev shybyn-shirkeıge qarsy kúrestiń bıyl da ýaqtyly júrgiziletinin jetkizdi.