Oralda «100 jańa esim» jeńimpazynyń kitaby jaryq kórdi
«Týǵan jer» baǵdarlamasy aıasynda qaladaǵy «Polıgrafservıs» baspasynan basylyp shyqqan kitapqa avtordyń ózi ósip-óngen Beles aýylynyń tarıhy, ákesi, Uly Otan soǵysynyń ardageri, «Qyzyl Juldyz» ordeniniń ıegeri Sary Áıtimovtiń ómir joly, onymen jumystas bolǵan ardagerler týraly jáne Aqserik Saryulynyń adamgershilik kelbetin pash etetin materıaldar toptastyrylǵan.
Batys Qazaqstannyń Zelenov aýdanynda kindik qany tamǵan, qazirgi tańda Qazaqstan ınnovatsııalyq jáne telekommýnıkatsııalyq júıeler ýnıversıtetiniń ǵylymı-bilim kesheniniń quryltaıshysy, tehnıka ǵylymdarynyń kandıdaty, QR Injenerlik akademııasy BQO fılıalynyń tóraǵasy, QR bilim berý isiniń qurmetti qyzmetkeri, «Qurmet» ordeniniń ıegeri Aqserik Saryuly týǵan jerimen baılanysyn úzgen emes. Sondyqtan jańa kitabynyń tusaýkeserin osy aýdandaǵy Beles aýylynda ótkizýi zańdy edi.
Sharada aýdan ákimi Ashat Shaharov Aqserik Saryulyn jańa kitabynyń jaryqqa shyǵýymen quttyqtap, onyń mańyzdylyǵyna toqtaldy.
«Siz Qazaq eliniń bilim jáne ǵylym salasynda ózin tanyta bilgen aıtýly tulǵalardyń birisiz. Árdaıym týǵan jerińizben baılanysyńyzdy úzbeı, adamdaryna qolushyn berip kelesiz. Óz kitabyńyzda da týǵan aýylyńyzdy keńinen qamtyp otyrsyz. Bul - elge degen úlken qurmet. Sizdi aýdan halqy da árdaıym maqtan tutady», dedi A.Shaharov.
Tusaýkeser rásimine oblystyq máslıhat hatshysy Málik Qulshar, jazýshy, Qazaqstan Jazýshylar odaǵynyń múshesi Mıra Shúıinshálıeva, aqyn Zakarııa Sısenǵalı jáne basqalar qatysyp, Aqserik Saryulynyń shyǵarmashylyq qyzmetine tabys tiledi.
Kezdesý barysynda Aqserik Áıtimov óziniń tálimgeri, Beles aýylynda mektep dırektory qyzmetin atqarǵan eńbek ardageri Maıdan Jubandyqovqa qurmet kórsetip, avtokóliktiń kiltin tabys etti.
