Oralda «100 jańa esim» jeńimpazdaryna qurmet kórsetildi
Astanada Elbasymen kezdesken pıanıst Saıda Qalyqova, medbıke Elena Shýshlebına jáne «KazIITÝ» ǵylymı-bilim kesheniniń quryltaıshysy Aqserik Áıtimovti quttyqtaǵan óńir basshysy olardyń qaı-qaısysynan da kópshilik úlgi alýǵa bolatynyn jetkizdi.
Memleket basshysy «Rýhanı jańǵyrý» baǵdarlamasy aıasynda uıymdastyrylǵan «100 jańa esim» jobasynyń jeńimpazdarymen júzdesý barysynda kóz janarynan aırylsa da, mýzyka áleminde bıik shyńdardy baǵyndyrǵan oraldyq Saıda Qalyqovaǵa ıgi tilegin bildirgen bolatyn . Shyndyǵynda da bala kúninde qos janarynan aıyrylǵanyna qaramastan, pıanınony erkin meńgergen Saıda Italııada «Bolashaq» baǵdarlamasy boıynsha bilim aldy.
Qazirgi kezde Astana qalasy ákimdigi memlekettik akademııalyq fılarmonııasynyń solısi S.Qalyqova ákimmen kezdesýde óz josparlary jóninde áńgimelep berdi. Ol Táýelsizdik meıramyna oraı birneshe kontsertke qatyspaqshy. Sondaı-aq Eýropanyń kontsert zaldarynda da óner kórsetýdi kózdeıdi. Ony pıanıst retinde Qazaqstan men Reseı ǵana emes, Italııada da jaqsy biledi.
Oblys ákimi Saıdanyń Oralda alǵash mýzykalyq bilim alyp, Aq Jaıyqtan túlep ushqanyn aıtyp, aldaǵy jyly týǵan qalasynda jeke kontsertin berýdi usyndy. Muny S.Qalyqova qabyl aldy. Shyn mánisinde alǵashqy kontsertin ol 4-synypta oqyp júrgende osy Oral qalasynda bergen bolatyn.
Zelenov aýdandyq aýrýhanasynyń medbıkesi qyzmetin atqaratyn Elena Shýshlebına medıtsına akademııasyna túsip, dáriger mamandyǵyn meńgergisi keledi. Bul onyń qolynan keletinine kúmán joq. Óıtkeni Elena bıylǵy 19 shildede Oral-Tasqala kúre joly boıynda ekiqabat áıeldi aman-esen bosandyryp alǵan bolatyn. Tasqaladaǵy aǵaıyn-týmalarynda qonaqta bolyp, Aqtóbege qaıtyp bara jatqan 35 jasar Roza esimdi kelinshekti kenet tolǵaq qysady. Oqıǵa oryn alǵan jerge jaqyn Zelenov aýdany ortalyǵy Peremetnyıdan jedel járdem shaqyrýǵa týra keledi. Bul kezde akýsher-gınekolog eńbek demalysynda eken. Áıelder bosanatyn bólimshede istegen tájirıbesi bar Elena Shýshlebına «Jedel járdemmen» birge jetedi. Onyń ústine bala teris kelgen eken. Soǵan qaramastan, Elena biliktilik tanytyp, áıeldi bosandyryp alyp, anasy men sábıin aýdandyq aýrýhanaǵa jetkizedi.
«KazIITÝ» ǵylymı-bilim kesheniniń basshysy, ǵalym, QR UIA akademıgi Aqserik Saryulyn batysqazaqstandyqtar jaqsy biledi. 1993 jyly ol qurǵan shaǵyn «Andas» oqý ortalyǵy búginde quramynda birneshe bilim ordasy bar «KazIITÝ» ǵylymı-bilim keshenine aınaldy. Qazaqstan men Reseıdiń jetekshi JOO-larymen tyǵyz baılanys ornatqan keshende kóptegen ınnovatsııalyq jobalar júzege asyrylyp keledi. Keshen budan bylaı da jastardy qazirgi zamanǵy ilim-bilim men tehnologııa jetistikterimen qarýlandyra bermekshi.
Kezdesý sońynda Altaı Kólginov «100 jańa esim» jobasynyń jeńimpazdaryna óz salalarynda tyń tabystarǵa qol jetkize berýlerine tilektestigin bildirdi.
Aıta keteıik, búgin Oralda «Jomart júrek» atty metsenattar forýmy ótýde. Oǵan Batys Qazaqstannan túlep ushqan 150 adam jınaldy. Olardyń arasynda saıasatkerler, kásipkerler, akterler, jazýshylar men qoǵam qaıratkerleri bar. Bári de «Týǵan jer» baǵdarlamasy aıasynda ózderiniń kishi otanyn qoldaý maqsatynda keldi.
