Oralda 100 oqýshy ulttyq úlgidegi mektep formalaryn kórsetti
ORAL. KAZINFORM — Ulttyq kıim kúnine oraı Oraldaǵy oqýshylar saraıynda «Ulttyq kıim – ult mádenıetiniń kórinisi» is-sharasy ótkizildi.
Atalmysh is-shara barysynda qalanyń 10 mektebinen kelgen ulttyq kıim úlgisindegi synyp oqýshylarynyń sherýi uıymdastyryldy.
Jıynǵa qatysqan Oral qalasynyń ákimi Mırjan Satqanov óz sózinde ulttyq kıim kııýdiń qoǵamda keńinen tarala bastaǵanyn atap ótti. Onyń aıtýynsha, hakim Abaıdyń «Kıim kııý salty arqyly adamnyń minez-qulqy, qoǵamdaǵy orny, bolmysy anyqtalady» degen sózi bar. Sondyqtan elimizdiń jastary sándi, dástúrli kıinse, olardyń ómir súrý sapasy, ulttyq sanasy ósip, ultyna degen qurmeti eselene bermek.
«Memleket basshysy Qasym-Jomart Kemeluly Atyraý tórinde ótken Ulttyq quryltaı jıynynda Ulttyq kıim kúnin engizýdiń mańyzdylyǵyna aıryqsha basymdyq berip, «Basqa jurt qazaqty kıiminen tanıtyn bolýy kerek», deı kelip, elikteýshilikten, ásire-dinshildikten saqtanyp, salt-dástúrimizden ajyramaýymyz kerektigin atap kórsetken bolatyn. Qazaqtyń salt-dástúri men ádet-ǵurpy, mádenıeti de ulttyq kıiminde. Osy jyly eńbek ujymdary men oqý oryndary ulttyq naqyshta kıiný úrdisin engizgenin baıqap júrmiz. Osyndaı bastamany batysqazaqstandyq bilim uıymdarynyń qoldaǵany da kóńil qýantady. Ata-analar qoldaý bildirse, ulttyq mádenıetimizdi kórsetetin ulttyq naqyshtaǵy mektep formasyn mektep jarǵysyna engizýdi usynýǵa bolady dep oılaımyn», - dedi shahar basshysy.
Іs-sharada, sondaı-aq, tehnologııa páni muǵalimderiniń qolynan shyqqan taqııa, sáýkele sııaqty ulttyq kıimderdiń sán kórsetilimi bolyp, «Qyz ǵumyry» ádebı-mýzykalyq kompozıtsııasy usynyldy.
Oral qalasy bilim berý bóliminen túsken málimetke qaraǵanda, ata-analardyń qoldaýymen naýryz aıynyń alǵashqy kúninen bastap oqýshylar mektepke zerli shapan, oıýly taqııa jáne zamanaýı úlgide tigilgen ulttyq kıimmen kelip júr. Ár synyp «Bir synyp – bir úlgi» qaǵıdatymen ulttyq úlgimen úndestirilgen mektep formalarymen erekshelenip, Ulystyń uly kúnin qarsy alýǵa zor yqylaspen daıyndaldy. Solardyń bir toby – 100 oqýshy synyp jetekshileriniń bastaýymen búgingi is-sharaǵa belsene atsalysty.
