Oralda 10 jasar qyzdy qaǵyp óltirgen júrgizýshige sot úkimi shyqty
ORAL. QazAqparat – Oralda 10 jasar oqýshy qyzdy qaǵyp óltirgen júrgizýshige sot úkimi shyqty, dep habarlaıdy QazAqparat tilshisi.
Oral qalalyq soty Valerıı Petrýnındi QR QK 345-baby (kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) jáne 347-babyna (jol-kólik oqıǵasy bolǵan jerden ketip qalý) sáıkes aıypty dep tanydy.
Ol 2,5 jylǵa bas bostandyǵynan aıyrý jazasyn qaýipsizdigi tómen qylmystyq-atqarý júıesi mekemesinde óteýge sottaldy. Sonymen qatar V.Petrýnın 5 jylǵa kólik quralyn júrgizý quqyǵynan aıyryldy.
Oǵan qosa sýdıa Maǵıra Qıtarova Oral qalasy ákimi atyna jeke qaýly shyǵardy.
Sot úkimi kúshine engen joq.
Qaıtys bolǵan qyzdyń ákesi Asylhan Qazıev sottalýshynyń eki kishkentaı balasy bolǵandyqtan, keshirgendigin jetkizdi.
Budan buryn jazǵanymyzdaı, atalǵan júrgizýshi ótken jyly 20 qarasha kúni keshkisin jaıaý júrginshi ótkelinen ótip bara jatqan 10 jasar qyzdy qaǵyp, oqıǵa ornynan boı tasalaǵan bolatyn.
Keıin ol ustalyp, eki aıǵa qamaýǵa alyndy.
Osy oqıǵaǵa baılanysty máıithanada qyzdyń súıegin shatastyryp, basqa bireýge berip jibergender jaýapqa tartylyp, Oral qalasy ákimine sógis jarııalandy.
