Oralda 10 jasar qyzdy zorlaý deregi: kent ákimdigine qatysty qylmystyq is qozǵaldy

ORAL. KAZINFORM — Oral qalasynda 10 jasar qyzdy zorlaý deregine sáıkes qylmystyq is boıynsha tergeý amaldary júrgizilip jatyr.

Oqıǵa 29 qyrkúıek kúni Zachagan kentindegi № 20 orta mektep mańynda bolǵan. Bastapqyda BQO polıtsııa departamenti jasóspirimge qatysty jasalǵan quqyqqa qaıshy áreket deregi boıynsha qylmystyq is qozǵalǵanyn habarlaǵan bolatyn.

Oral qalasynyń prokýrory Meıirhan Іzimovtiń málim etkenindeı, qylmys bolmastan buryn ata-analar sol mektepke barar joldaǵy aǵashtardy otap, shamdardy ornatý jóninde áldeneshe ret shaǵymdanǵan. Alaıda Zachagan kentiniń ákimdigi buǵan salǵyrt qaraǵan. Tek oqıǵa bolǵannan keıin ǵana jol boıyndaǵy aǵashtar otalyp tastaldy. 

Prokýrordyń aıtýynsha, óz qyzmetterine salǵyrt qaraǵany úshin Zachagan kenti ákimdiginiń laýazymdy qyzmetkerlerine qatysty qylmystyq is qozǵaldy. Sonyń barysynda barlyq mán-jaı anyqtalyp, protsessýaldyq sheshim qabyldanady. 

BQO polıtsııa departamentiniń baspasóz qyzmeti tergeý basqarmasynda jergilikti atqarýshy organǵa qatysty QR QK 371-babyna (salǵyrttyq) sáıkes qylmystyq is tirkelgenin rastady. 

- Ózge aqparat QR Qylmystyq is júrgizý kodeksiniń 201-babyna sáıkes jarııa etýge jatpaıdy, - dep habarlady vedomstvodan.

Departament málimetine sáıkes 10 jasar qyzdy zorlaý deregi boıynsha tergeý amaldary jalǵasýda. 

Eske sala keteıik, budan buryn BQO-da kishkentaı qyzdy zorlaý deregi boıynsha qylmystyq is sotqa berilgenin jazǵan edik.