Oralda 10 jasar balany kóligimen qaǵyp óltirgen qyzǵa úkim shyqty
ORAL. QazAqparat – Oralda on jasar balany kóligimen qaǵyp óltirgen qyzǵa úkim shyqty, dep habarlaıdy QazAqparat tilshisi.
Oral qalalyq sotynyń úkimimen 22 jastaǵy qyz QR QK 345-baby 3-bóligine sáıkes aıypty dep tanylyp, 1 jyl bas bostandyǵynan aıyrý jazasyn qaýipsizdigi barynsha tómen qylmystyq-atqarý júıesi mekemesinde óteý belgilendi.
Ol sondaı-aq 5 jyl merzimge kólik quralyn basqarý quqyǵynan aıyrylyp, kúzetpen ustaý túrindegi bultartpaý sharasy ózgerissiz qaldyryldy.
Sot talqysynda anyqtalǵandaı, sottalýshy 17 qarasha kúni saǵat 09.11 shamasynda «Hyundai Tucson» avtokóligimen Máskeý kóshesimen kele jatyp, oqýshylar saraıy tusynda rettelmeıtin jaıaý júrginshiler ótkelinen ótip bara jatqan 10 jasar balany qaǵyp ketken.
Bala qalalyq kópbeıindi aýrýhanasyna jetkizilgenimen, esin jııa almastan, saǵat 10.05-te kóz jumdy.
Basty sot talqysynda sottalýshy ózine taǵylǵan aıypty tolyq moıyndap, jeńil jaza taǵaıyndaýdy surady.
Jábirlenýshi ókili de qazirgi tańda sottalýshyǵa qoıar talaby joqtyǵyn jetkizip, jeńil jaza taǵaıyndaýdy ótingen.
Sot úkim shyǵarǵan kezde sottalýshynyń jeke basy men jastyǵyn jáne qyz bala ekenin, buryn sotty bolmaǵanyn, istiń mán-jaıyn, jaýaptylyǵy men jazasyn jeńildetetin mán-jaılaryn, jábirlenýshi ókiliniń sottalýshyǵa qatysty jaza taǵaıyndaý jónindegi pikirin eskerdi.
BQO sotynyń baspasóz qyzmeti málim etkendeı, úkim zańdy kúshine engen joq.
Eske sala keteıik, budan buryn Oralda jol apatynan 10 jasar balanyń qaza tapqanyn, BQO-da jańa týǵan sábıin ájethanaǵa tastaǵan qyzǵa sot úkimi shyqqanyn jazǵan bolatynbyz.
