Oralda 10 gektar jerdiń shóbi órtendi
ORAL. QazAqparat – Oralda 10 gektar jerdiń shóbi órtendi, dep habarlaıdy QazAqparat tilshisi.
BQO TJ departamenti zilzalanyń qaýip-qaterin azaıtý jáne azamattyq qorǵaý salasyndaǵy baqylaý basqarmasynyń basshysy Erlan Tóregeldıevtiń aıtýynsha, oqıǵa 20 sáýir kúni jergilikti saǵat 13.24-te qalaǵa qarasty Komıntern kenti aýdanynda oryn aldy.
Qurǵaq shópke qosa qamys pen butalar da otqa orandy.
«Tilsiz jaýdy» aýyzdyqtaýǵa 4 tehnıka, 14 adam jumyldyryldy.
Qara tútini býdaqtap, aınalaǵa tarap, qala turǵyndarynyń alańdaýshylyǵyn týǵyzǵan órt saǵat 17.32-de sóndirildi.
Bıyl oblysta jyl basynan beri jalpy kólemi 909 ga jerde 89 tabıǵı janý tirkeldi.
«Jazǵyturym turǵyndar qýraǵan shópti órteıdi. Keıde alaý jaǵý men otpen abaı bolmaý, temekini sóndirmeýdiń sońy órtke ulasady. Osynyń basym kópshiligi adamdarǵa baılanysty. Qazirgideı kúrdeli ýaqytta adamdardyń úıde otyrǵany mańyzdy. Eger órttiń shyǵýyna kináliler anyqtalatyn bolsa, olarǵa tótenshe jaǵdaı talabyna sáıkes eń qatań ákimshilik shara qoldanylatyn bolady», dedi QazAqparat tilshisine E.Tóregeldıev.
Eske sala keteıik, budan buryn Oralda 9 gektar jerdiń qurǵaq shóbi órtengenin jazǵan bolatynbyz.
