Oralda 1 jasar qyz tórtinshi qabattan qulap ketti

Oralda 1 jasar qyz tórtinshi qabattan qulap ketti, dep habarlaıdy QazAqparat tilshisi.

BQO polıtsııa departamentiniń baspasóz qyzmetinen málim etkenindeı, 23 qyrkúıek kúni tórtinshi qabattan qulap ketken búldirshin túrli jaraqattarmen aýrýhanaǵa jatqyzyldy.

«Oqys oqıǵa kezinde qyzdyń qasynda ájesi bolǵan. Qazirgi kezde atalǵan derek boıynsha QR QK 141-baby 1-bóligine (balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý) sáıkes Abaı polıtsııa bóliminiń qyzmetkerleri sotqa deıingi tergeý amaldaryn júrgizýde», dep habarlady vedomstvodan.

Atalǵan bap boıynsha aıypty dep tanylǵan adam belgili bir laýazymdardy atqarý nemese belgili bir qyzmetpen aınalysý quqyǵynan úsh jylǵa deıingi merzimge aıyra otyryp nemese onsyz, 2 myń AEK-ke deıingi mólsherde aıyppul salýǵa ne sol mólsherde túzeý jumystaryna ne 600 saǵatqa deıingi merzimge qoǵamdyq jumystarǵa tartýǵa ne eki jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.

BQO densaýlyq saqtaý basqarmasy baspasóz qyzmetiniń naqtylaýynsha, Ábýbákir Kerderi kóshesi 135-mekenjaıynan (bes qabatty úı) 2022 jylǵy qyz jedel járdemmen oblystyq kópbeıindi balalar aýrýhanasyna jetkizildi. Medıtsınalyq tekserýden ótkizilip, travmatologııa bólimshesine jatqyzyldy. Jaǵdaıy ortasha aýyr, denesiniń kógergen jerleri bar.