Oral JEO-ny jańǵyrtýǵa 6,7 mlrd teńge jumsalmaq
ORAL. QazAqparat - Batys Qazaqstan oblysynyń ákimi Altaı Kólginov «Jaıyqjylýqýat» AQ-da bolyp, Oral jylý-elektr ortalyǵynda júrgizilip jatqan jańǵyrtý jumystarymen tanysty, dep habarlaıdy «QazAqparat» tilshisi.
Óńir basshysynyń sózine qaraǵanda, úsh kezeńmen júrgiziletin jańǵyrtý jumystary barysynda aldymen qos týrboagregat jóndeledi. Bul qazandyqtar 10 MVt óndirýi tıis bolsa, qazirgi ónimdiligi - 7 MVt. Jańǵyrtylǵannan keıin olardyń qýaty 18 MVt-ǵa jetetin bolady. Jaıyq ózenine jańadan ornatylǵan sýsorǵylardyń qolaılylyǵy sol, eń bastysy, sýdy únemdi paıdalanýǵa múmkindik beredi. Sonymen qatar paıdalanylǵan sý ózenge qaıta quıylmaıdy, ıaǵnı ekologııalyq jaǵynan da tıimdi. Úsh kezeń boıynsha jańǵyrtý jobasynyń jalpy quny - 6,7 mlrd teńge. Ol Úkimettiń, Eýropa qaıta qurý jáne damý bankiniń qoldaýymen júzege asyrylmaq. Buǵan jergilikti bıýdjetten de qarjy qarastyryldy. Qazandyqtar men jabdyqtardy jańǵyrtý, aýystyrýǵa qosa aldaǵy jyly «Nurly jol» baǵdarlamasy aıasynda jylý jelilerin qaıta qurý jumysy jalǵasady.
«Jaıyqjylýqýat» AQ-nyń bas dırektory Murat Báımenovtiń aıtýynsha, bıyl jylý áleýmettik nysandarǵa 25 qyrkúıekten berile bastady. Olarǵa jylý qazir tolyqtaı berilse, 1175 turǵyn úıdiń 728-i nemese 62 paıyzy alyp úlgerdi. Qalǵan úılerge de taıaý kúnderi jylý qosylatyn bolady. Kásiporyn «QazTransGazAımaq» mekemesine tutynylǵan gaz úshin qaryzyn birte-birte sheship keledi. Sondaı-aq turǵyndardan tutynylǵan jylý úshin qaryzdy qaıtarý jolynda naqty sharalar alynýda.
