Oral jáne Aqsaı qalalarynda jedel basqarý ortalyqtary salynýda
ORAL. QazAqparat - Oral jáne Aqsaı qalalarynda jedel basqarý ortalyqtarynyń qurylysy júrgizilýde, dep habarlaıdy «QazAqparat» tilshisi.
Oblys ákiminiń orynbasary Ǵabıdolla Ospanqulovtyń qatysýymen ótken turǵyndarmen kezdesýde BQO ІІD jergilikti polıtsııa qyzmetiniń bastyǵy, polıtsııa polkovnıgi Manarbek Ǵabdýllınniń málim etkenindeı, bıyl osy ortalyqtarmen birge qosymsha beınekameralar ornatý kózdelýde.
Qazirgi kezde oblys aýmaǵynda 563 beınebaqylaý kamerasy ornatylsa, sonyń 106-sy Oraldaǵy jedel basqarý ortalyǵyna, 346-sy ýchaskelik polıtsııa beketterine, 111-i aýdandyq ishki ister bólimderine qosylǵan. 2017 jyly ýchaskelik polıtsııa beketterine qosylǵan 100 kamera ornatyldy.
Ótken jyly beınebaqylaý júıesiniń kómegimen 88 qylmys ashylyp, 15 myńnan astam quqyqbuzýshylyqtyń joly kesildi. Jergilikti polıtsııa qyzmetkerleri 127 myńnan astam ákimshilik quqyqbuzýshylyqty ashsa, sonyń 54 myńy «múldem tózbeýshilik» qaǵıdaty aıasynda júzege asty. 795 mln teńge aıyppul salyndy. Turǵyndardyń tártip saqshylaryna degen senimin nyǵaıtý maqsatynda 2017 jyly polıtsııa qyzmetkerleri 97 myńnan astam túrli shaqyrtýlarǵa baryp, azamattardyń 7 myńnan astam aryz-shaǵymyn qarady.
Atqarýshy organdar jergilikti polıtsııa qyzmetin materıaldyq-tehnıkalyq jaǵynan qamtamasyz etýde udaıy qoldaý kórsetip keledi. Mysaly, eki jylǵa jetpeıtin ýaqyt ishinde aýyldyq ýchaskelik polıtsııa ınspektorlarynyń avtoparki tolyqtaı jańartyldy, munyń oń jemisi de joq emes.
Óńirde aýyr jáne asa aýyr qylmystar sany azaıyp, olardyń ashylý deńgeıi 77 paıyzǵa jetti. Jalpy, qylmysty ashý jóninen BQO respýblıkada aldyńǵy oryndardyń birin ıelenedi.
Aıta keteıik, oblys boıynsha kún saıyn 800-den astam qyzmetker qoǵamdyq tártipti saqtaýǵa shyǵady, sonyń ishinde Oralda 480 qyzmetker Ulttyq ulan jaýyngerlerimen birge (250 avtokólik) el tynyshtyǵyn kúzetedi. Ótken jyldyń 20 qazanynan beri iske kirisken atty polıtsııa da avtokólik bara almaıtyn jerlerde óz qyzmetiniń tıimdi ekendigin kórsetýde.
