Oral voleıbolynyń túlegi Serbııa chempıonatynda óz klýbymen úzdik úshtikke kirdi

ORAL. KAZINFORM — Qazaqstandyq voleıbolshy Sana Anarqulova óner kórsetetin «Ýb» klýby Serbııanyń turaqty chempıonatynda úshinshi orynǵa ıe boldy.

«Ýb» sońǵy oıynda «Partızan» komandasyn 3:0 (25:19, 25:20, 25:21) esebimen utty. 

Turaqty chempıonat qorytyndysy boıynsha Sananyń klýby 51 upaı jınap, pleı-off kezeńine joldama aldy. 

«Jeleznıchar» 58 upaımen kósh bastasa, «Tent» (53 upaı) ekinshi orynǵa turaqtady. 

Sana Anarqulova (qyz kúnindegi tegi Jarlyǵasova) oraldyq bapker Kóleńke Ǵubashevtyń basshylyǵymen jattyǵyp, sporttyq jolyn BQO-nyń «Gratsııa KZ» komandasynda bastady. 

Keıin «Irtysh-Kazhrom», «Almaty», «Astana», «Altaı» jáne «Turan» klýbtarynda oınap, segiz dúrkin Qazaqstan chempıony atandy. Ótken jyly túrkistandyq «Turandy» komanda kapıtany retinde órge súıredi.

Ol sondaı-aq Qazaqstan ulttyq quramasynyń kapıtany retinde ózgelerge úlgi kórsetip keledi.

S.Anarqulova — Azııa kýbogynyń eki dúrkin qola júldegeri. Azııa oıyndarynda qola medal aldy. Oǵan qosa klýbtyq komandalar arasynda Azııa chempıonatynda altyn men kúmiske qol jetkizdi.

Eske sala keteıik, budan buryn «Turannyń» óz tarıhynda tuńǵysh ret voleıboldan el chempıony atanǵanyn jazǵan bolatynbyz.