Oral turǵyny saıajaıynda kóknár ósirgen

ORAL. QazAqparat – Oral qalasynyń turǵyny saıajaıynda kóknár ósirgen, dep habarlaıdy QazAqparat tilshisi.

BQO polıtsııa departamentiniń baspasóz qyzmeti málim etkendeı, «Qarasora» jedel aldyn alý is-sharasy barysynda 14 maýsym kúni saǵat 11.40-ta «Vıshenka» saıajaı qoǵamynda 35 jastaǵy er adam ustaldy.

Onyń saıajaı ýchaskesin qaraý kezinde 116 buta kóknár tabylyp, tárkilendi. Kóknárdi turǵynnyń ósirgeni baıqalady. 3 dana shelek, quraldar, topyraqqa qosatyn arnaıy zat ta shyqty.

Sondaı-aq 12 maýsym kúni saǵat 18.00-de N.Ábdirov kóshesinde ornalasqan úıdiń aýlasynan 1963 jylǵy turǵynǵa tıesili 14 buta kóknár tabyldy.

Butalar BQO boıynsha sot saraptamasy ınstıtýtyna jiberildi.

Qazirgi kezde eki oqıǵa boıynsha QR QK 300-baby 1-bóligine (quramynda esirtki zattar bar, ósirýge tyıym salynǵan ósimdikterdi zańsyz egip-ósirý) sáıkes sotqa deıingi tergeý amaldary júrgizilýde.

Eske sala keteıik, budan buryn BQO turǵynynan granata, myltyq, qylysh jáne dinı kitaptar tárkilengenin jazǵan bolatynbyz.