Oral turǵyny esirtkige elitken kúıinde áıeldi tonady
ORAL. QazAqparat - Oralda esirtkige eltigen turǵyn áıeldi tonap, qolǵa tústi, dep habarlaıdy QazAqparat tilshisi.
Oral qalasy polıtsııa basqarmasynan túsken málimetke qaraǵanda, oqıǵa 27 sáýir kúni keshkisin oryn aldy.
Keshki saǵat 20.00-der shamasynda «102» pýltine áıel adam habarlasyp, óziniń tonalyp, uıaly telefonnan aıyrylyp qalǵanyn jetkizedi.
Adam tonaý deregi «Omega» zaýyty aýdanyndaǵy H.Esenjanov kóshesi 13-úı mańynda bolǵan. №13 ýchaskelik polıtsııa pýnktiniń ınspektory, polıtsııa aǵa leıtenanty Aıdar Bısenǵalıev sol boıda oqıǵa ornyna jetkende, áıel ózin tonaǵan er adamnyń kıgen kıimin, túr-tulǵasyn baıandap beredi. Aqyry tártip saqshysy V.Zaharov kóshesi 27-úı mańynan kúdiktini qolǵa túsirdi.
Polıtsııa aǵa leıtenanty kúdiktiniń qolynan telefondy alyp, ózin oblystyq narkologııalyq dıspanserge jetkizdi. Dárigerlik tekseristen ótkizgende, onyń esirtkige masań kúıde bolǵany anyqtaldy.
Tekseris barysynda 1996 jylǵy bul azamattyń buryn sottalmaǵany, otbasyn qurǵany, oraldyq turǵyn ekeni, esh jerde jumys jasamaıtyny belgili boldy. Onyń qolynan eshqaıda ketpeý jóninde qolhat alynyp, kisi tonaý deregine qatysty tergeý amaldary júrgizilýde.
Quny 70 myń teńgeni quraıtyn «Hýaveı» markaly uıaly telefon ıesine qaıtaryldy. Zardap shegýshi, 1994 jylǵy Olga esimdi azamatsha tártip saqshylaryna rızashylyǵyn aıtyp, qyzmetterine tabys tiledi.
