Oral turǵyny burynǵy áıeli men qyzyn syrtynan jaýyp, úıge ot qoıǵan
ORAL. QazAqparat – Oral polıtsııasy burynǵy áıeli men qyzynyń úıin órtep jibermek bolǵan er adamdy ustady, dep habarlaıdy QazAqparat uralskweek.kz saıtyna silteme jasap.
Zachagan kentiniń turǵyny Gúlmıra Ihsanovany 20 shilde kúni qyzymen birge tirideı órteı jazdaǵan. Áıeldiń burynǵy kúıeýi Ǵalymjan Saqqazov úıdiń ústine benzın quıyp, esikti jaýyp, órtep jibergen. Áıel men bala qashyp úlgergen, al polıtseıler qaskúnemdi ustady, biraq ony kelesi kúni tańerteń bosatyp jibergen.
Áıel jıi iship kelip, ózin uryp soqqan burynǵy kúıeýimen 5 jyl buryn ajyrasqanyn aıtyp otyr. Ekeýi 17 jyl birge nekede turǵan.
Órttiń saldarynan úıdiń shatyry men qabyrǵalarynyń bir bóligi janyp ketken. Kelgen shyǵynnyń quny 1 mıllıon teńgege baǵalanady. Biraq Gúlmıra burynǵy kúıeýiniń osy somany tóleıtinine senbeıdi de. Áıeldiń aıtýynsha, ol balalarǵa eshqashan materıaldyq kómek kórsetpegen.
— Meniń otbasymdy jaıyn qaldyrsa eken degen bir ǵana armanym bar, — deıdi Gúlmıra.
Zachagan polıtsııa bóliminiń bastyǵy Tımýr Aıtýǵanov eki adamnyń ómirine qastandyq jasamaq bolǵan jáne kinásin moıyndaǵan qylmyskerdiń nege áli kúnge de bostandyqta júrgenin aıtty.
— Biz ony túrmege otyrǵyza almaımyz, óıtkeni karantın jaǵdaıynda pedofılııa, adam óltirý nemese zorlaý sııaqty asa aýyr qylmys jasaǵan kúdiktilerdi ǵana qamaýǵa alady. Ókinishke oraı, Saqqazovtyń áreketteri sotqa qamaýǵa alý túrindegi bultartpaý sharasy týraly ótinish berýge resmı túrde negiz bolmaıdy. Sonymen qatar, men QR QK-niń 202-baby 2-tarmaǵy boıynsha qylmystyq is qozǵaldy. Bul - 7 jylǵa deıin bas bostandyǵynan aıyrý jazasy qarastyrylǵan aýyr qylmys. Qazir jeńildetilgen tártipte is 15 kún ishinde sotqa beriledi, sebebi kúdikti óz kinásin tolyq moıyndady, — dep túsindirdi Aıtýǵanov.
