Oral turǵyny 59 mln teńgeniń temeki ónimderin zańsyz satýmen aınalysqan

ORAL. QazAqparat – Oral qalasynyń turǵyny quny 59 mln teńge turatyn temeki ónimderin zańsyz satýmen aınalysqan, dep habarlaıdy QazAqparat tilshisi.

BQO boıynsha ekonomıkalyq tergeý departamentiniń baspasóz qyzmetinen málim etkenindeı, atalmysh turǵyn Almatydan kontrabandalyq temeki ónimderin tasymaldap, qala bazarlaryndaǵy bólshek saýda oryndary arqyly satqan.

«Turǵynnan 100 myńǵa jýyq qorap temeki tabyldy. Ol qomaqty kólemde aktsızdeletin taýarlardy saqtaý, tasymaldaý jáne ótkizýmen baılanysty kásipkerlik qyzmettiń tyıym salynǵan túrimen aınalysqan. Zańsyz temeki ónimderiniń jalpy sany 93 myń qoraptan asyp, quny 59 mln teńgeni qurady. Atalǵan derek negizinde BQO boıynsha ekonomıkalyq tergeý departamenti qylmystyq isti aıaǵyna deıin jetkizdi. Sot atalǵan azamatty kináli dep tanyp, oǵan bir jyl bas bostandyǵyn shekteý jazasy taǵaıyndaldy, zattaı aıǵaqtar odan ári sharalar qabyldaý úshin sot oryndaýshylaryna jiberildi», dep habarlady vedomstvodan.

Eske sala keteıik, budan buryn BQO-da 541 mln teńgeden astam zalal keltirgen qarjy pıramıdasy boıynsha tergeý júrip jatqanyn jazǵan bolatynbyz.