Oral turǵyny: úıimiz sýǵa ketkende berilgen páterdi ákimdik qaıtaryp almaqshy

ORAL. KAZINFORM — Oral qalasynyń turǵyny, muǵalim Aınur Sabyr ótken jyly úıi sýǵa ketkennen keıin berilgen páterdi ákimdik qaıtaryp almaq bolyp jatyr dep shaǵymdandy. A.Sabyrdyń áleýmettik jelide málim etkenindeı, 2024 jyly Oral qalasy aýmaǵynda ornalasqan, ishine gaz, jaryq, sý tartylǵan úlken qysqy úıi bir aı sý astynda turǵan.

Onyń sózine qaraǵanda, QR Prezıdenti Q.K.Toqaevtyń «Sý tasqynynan zardap shekkenderdiń barlyǵyna úı beriledi» degen tapsyrmasyna oraı Oral qalasy ákimdigi ótken jyly jaramsyz úıdiń ornyna baspana berip, shyǵyndaryn ótegen.

— Bir jyldan keıin Batys Qazaqstan oblysynyń ákimi Narıman Tóreǵalıev turǵyndardy sotqa berip, Oral qalasy ákimdigi bergen úıdi zańsyz dep tanylýyn surap otyr. Bizge úı berer kezde qujattarymyz birneshe tekserýden ótti. Sýǵa ketken úıimizdi mamandar «turýǵa jaramsyz» dep, arnaıy komıssııalar «úı berilsin» dep sheshim shyǵarǵan bolatyn. Tótenshe jaǵdaıdan zardap shekkenderge Prezıdenttiń tapsyrmasymen elimizdiń kásipkerleri kómektesti. Maǵan da «Alageum» zaýytynyń demeýshiligimen úı berildi, — deıdi turǵyn.

Onyń aıtýynsha, zardaptyń qara bulty seıilip, basyna túsken aýyr jaǵdaıdy endi umyta bastaǵanda, oblys ákimi óz turǵyndaryna ozbyrlyq kórsetip, tisin batyryp otyr.

— Úıimiz sýdyń astynda qalyp, barmaǵan jerimiz, qaqpaǵan esigimiz qalmaǵan kezde bizdiń qujattarymyzdyń qaralýyna Oral qalasy prokýratýrasy da aralasyp, otyz shaqty turǵyn birdeı sanatta úı aldyq. Jaǵdaıymyz birdeı. Qylyshyn súıretip, qys kelgende, oblys ákimi bizdi qaıda jibermekshi? Jaramsyz úılerimiz buzyldy. Jeri úkimettiń ıeligine ótip ketti. Endi biz qaıda baramyz? Álde Prezıdenttiń tapsyrmasy tótenshe jaǵdaıdyń daý-damaıy basylǵansha oryndalǵan ba? Oblys ákimi óz turǵyndaryna janashyrlyq tanytpasa, bizge kim kómektesedi? — deıdi A.Sabyr.

Osy máselege oraı Kazinform tilshisine arnaıy saýal joldady. 

BQO ákimdiginiń baspasóz qyzmeti usynǵan málimetke qaraǵanda, BQO boıynsha ekonomıkalyq tergep-tekserý departamenti júrgizgen taldaý nátıjelerine sáıkes Oral qalasy ákimdigi janyndaǵy komıssııanyń jekelegen músheleri tarapynan oblys aýmaǵyndaǵy sý tasqyny saldaryn joıý kezeńinde saıajaı alaptary turǵyndaryna turǵyn úı bólý jáne keltirilgen zalaldy óteý barysynda zańǵa qaıshy áreketter jasalǵany anyqtaldy.

Taldaý materıaldary komıssııa jumysyn zańnamaǵa sáıkestendirý boıynsha tıisti sharalar qabyldaý maqsatynda oblys ákimine joldandy.

— Kelip túsken taldaý materıalyn jan-jaqty qarap, zańdy sheshim qabyldaý úshin komıssııa quramynda bolǵan eki adamǵa qatysty sotqa talap-aryz berildi. Bul másele boıynsha baǵa berý jáne sheshim shyǵarý sottyń quziretine jatady. Bul rette atalǵan jaǵdaıǵa quzyretti organ — tek qana sot túpkilikti baǵa beredi, al faktilerdi burmalap, qoǵamda jalǵan túsinik qalyptastyratyn kez kelgen jarııa málimdemeler sot tóreligine qysym jasaý áreketi retinde qarastyrylýy múmkin, — delingen resmı jaýapta.

Eske sala keteıik, budan buryn Oralda jataqhana turǵyndary jańbyr jaýsa, sý keshetini týraly dabyl qaqqanyn jazǵan edik.