Oral turǵyny qyzyn synyptastary uryp-soqqany jóninde shaǵym jasady

ORAL. KAZINFORM – Oral qalasynda turatyn áıel qyzyn synyptastary uryp-soqqany jóninde málimdedi.

Qala turǵyny Instagram áleýmettik jelisinde mamochki_uralska_vmeste pablıginde jazǵanyndaı, bir aı buryn qyzy mektepten synǵan telefonymen jylap kelgen.

«Ol 5-synypta oqıdy. Ózi aıtpaǵan soń jaǵdaıyn kórip, onyń nómirinen synyptastarynan mektepte ne bolǵanyn surap edim. Synyptastarynyń jazǵanyn kórip, shoshydym. Synyptastarynyń úsheýi uryp, ekeýi telefonyn tartyp alyp, bir-birine laqtyryp turypty, jerge de túsirgen. Bir synyptasy dırektorynyń orynbasaryn shaqyrǵan. Jaǵdaıdy anyqtaý barysynda synyptastary oǵan artyq salmaǵy jáne kózildirik taqqany úshin býllıng jasalatynyn aıtty», dep jazady áıel. 

Onyń málimdeýinshe, sol kúni uryp-soqqan jerin jaraqat pýnktinde túsirgen. Qyzynyń mıy shaıqalyp, basy, qoly men jambasynyń eti kógergen. 

«Ýchaskede oqıǵanyń saldaryn sezinbegendikten ári mektep dırektory orynbasarynyń bári sheshiledi degen sózine senip, onyń ótinishi boıynsha aryzymdy qaıtyp alyp edim. Biraq jınalysta birde-bir ata-ana kelip, balasy úshin keshirim suramady. Basqa balalar qalaı bolǵanyn aıtyp berdi. Munyń báriniń jazbasy bar», deıdi ol.

Anasynyń sózine qaraǵanda, qazirgi kezde qyzynda jaraqattan keıin entsefalopatııa jáne ıshemııalyq optıkopatııa (kóz kórýiniń nasharlaýy) paıda bolǵan. Budan keıin taǵy da shaǵym túsirgen soń qyzyn sot-medıtsınalyq saraptamaǵa jibergen.

«Qyzymnyń kóńil-kúıi joq, basy aýyryp, qusqysy keledi. Ata-analar men mekteptiń ústinen sotqa shaǵym bergim keledi. Qyzym ózin kelemej jasaıtyn bolǵan soń aıtpaǵan. Munyń bári mektep qabyrǵasynda bolǵan. Ne mektep, ne ata-ana, esepke qoıǵany bolmasa, jaýapqa tartylǵan joq. Eger saý bala jaraqat alsa, zardaptary mundaı bolmas edi. Al onyń kózine áser etti, múgedektikke berip jatyrmyz», deıdi áıel. 

BQO polıtsııa departamenti baspasóz qyzmetiniń naqtylaýynsha, Oral qalasy turǵynynyń ótinishi boıynsha Shaǵan polıtsııa bólimi materıal jınaqtaǵan. Sosyn ony qaraý úshin Oral qalasy ákimdiginiń janyndaǵy kámeletke tolmaǵandar isteri jónindegi komıssııaǵa joldaǵan.

«Atalmysh oqıǵa komıssııa tóraǵasy, Oral qalasy ákiminiń orynbasary Aslan Tapıshevtiń, oqýshylar men olardyń zańdy ókilderi, psıhologtar men pedagogterdiń qatysýymen qaraldy. Komıssııa sheshimi boıynsha oqýshylardyń ata-analaryna balalaryn tárbıeleý týraly eskertý jasaldy. Sondaı-aq tártip buzǵan oqýshylar oqıtyn mekteptiń atyna, polıtsııa jáne bilim berý bólimine osyǵan uqsas jaǵdaılardy qaıtalamaý maqsatynda usynystar berildi. Mektepke kámeletke tolmaǵandar isteri jónindegi ýchaskelik polıtsııa ınspektory bekitilgenin habarlaımyz. Sonymen qatar beınebaqylaý kameralary ornatylǵan. Oqýshylar arasyndaǵy quqyq buzýshylyqtardyń aldyn alý boıynsha jumystar udaıy júrgizilýde», dep habarlady vedomstvodan.

BQO bilim basqarmasynyń baspasóz qyzmeti aqparatty keıin beretinin jetkizdi.

Eske sala keteıik, budan buryn bokstan BQO-da 10 jastaǵy balaǵa býllıng jasalýyna baılanysty jasóspirimniń anasy jaýapqa tartylǵanyn jazǵan bolatynbyz.