Oral turǵyny: Qyzymdy dertten qutqarǵan dárigerge alǵysym sheksiz

ASTANA. KAZINFORM – Alǵys aıtý kúninde Oral qalasynyń turǵyny Prezıdent is basqarmasyna qarasty Medıtsına ortalyq aýrýhanasynyń dárigeri Abylaı Serikbaıǵa alǵys aıtty.

Oraldyq ana qyzynyń 11 jastan jastap basy aınalyp, jıi talyp qalatyn dertke shaldyqqanyn aıtady. Byltyr qazan aıynda Prezıdent is basqarmasy Medıtsınalyq ortalyǵynyń aýrýhanasyna qaralyp, magnıtti rezonanstyq tomografııa arqyly jetkinshektiń sol jaq mıyndaǵy qantamyrdyń tuıyqtalǵany anyqtalady.

Tekseris tolyq ótkennen keıin neırohırýrg Abylaı Serikbaı kúrdeli otany sátti jasap shyǵady. Qazir naýqastyń jaǵdaıy aıtarlyqtaı jaqsaryp, aýrýhanadan shyǵýǵa daıyndalyp jatyr.

— Osy emhanada Abylaı Serikbaı esimdi bilikti neırohırýrg bar ekenin estip, Oral qalasynan keldik. Dárigerge qujattarymyzdyń elektrondy nusqasyn jibergennen bastap bizben baılanysta bolyp otyrdy. Qandaı taldaýlar qajet, kvotany qalaı alady, qalaı daıyndalyp kelý kerek — bárin túsindirdi. Dáriger emes baýyrymyzdaı bolyp ketti. Qyzymnyń operatsııasy sátti ótip, qazir qalpymyzǵa kelip jatyrmyz. Endi ol jańa ómir bastaıdy. Abylaı Shoqanulyna ómir boıy alǵys aıtyp ótemiz, ǵumyry uzaq bolsyn. Sonymen qatar kúnde jaǵdaıymyzdy kelip suraıtyn bizdiń emdeýshi dáriger Aılın Qanatqyzyna, osyndaǵy barlyq ujymǵa alǵysymyz sheksiz, - deıdi oraldyq ana.

Kúrdeli otany eńsergen qyzdyń syrqaty medıtsına tilinde «moıamoıa sındromy» dep atalady. Bul aýrýda ishki uıqy arterııalarynyń basty tarmaqtary taryla bastaıdy nemese tolyǵymen bitelip qalady. Saldarynan mıǵa qan jetkilikti túrde barmaı, mı ishinde qosymsha qantamyrlardyń (collateral) paıda bolady. 

Biraq bul qantamyrlar da ýaqyt óte kele mıǵa qajetti mólsherde qan jetkize almaı qalýy múmkin. Aýrý asqyna berse, bas aýrýy jıilep, talma jıilep, aqyry ınsýltqa ákep soǵýy múmkin. Sondyqtan durys dıagnostıka men ýaqytynda em alý óte mańyzdy.