Oral turǵyny avtosalonnan 17,8 mln teńgege satyp alǵan avtokólik jaramsyz bolyp shyqty

 ORAL. KAZINFORM — Oral qalasynyń turǵyny jaramsyz avtokólik úshin tólengen qarjysyn qaıtaryp alý úshin №2 qalalyq sotqa júgindi. 

BQO boıynsha saýda jáne tutynýshylar quqyǵyn qorǵaý departamentinen málim etkenindeı, turǵyn ótken jyly 30 mamyrda qaladaǵy avtosalondardyń birinen 17 mln 840 myń teńge turatyn avtokólik satyp alǵan. 

Talap aryzda jazylǵanyndaı, nebári 15 myńnan astam shaqyrym jol júrgennen keıin avtomobıl synyp qalyp, satýshyǵa qaıtarylǵan. 

Avtokóliktiń syný sebepterin anyqtaý sozylyp ketkendikten, tutynýshy jaýapkerden taýardyń tehnıkalyq jaı-kúıi týraly derekter berýdi suraǵan. 

Satýshy óz jaýabynda avtokóliktiń tehnıkalyq jaı-kúıi jaramsyz ekendigin moıyndaǵan. Budan keıin tutynýshy taýardy almastyrýdy nemese satý-satyp alý kelisim-shartyn buzyp, kólik qunyn tolyq qaıtarýdy talap etken. Alaıda bul talap qanaǵattandyrylmaǵannan keıin turǵyn avtokólik qunyna qosa 7 mln 784 myń teńge turaqsyzdyq aıybyn, 3,6 mln teńge zalaldy jáne sot shyǵynyn óndirý jóninde sotqa júginýge májbúr bolǵan. 

Sot talqysy barysynda sot-saraptamalyq zertteý negizinde avtokólikte aqaýlyqtar bar ekeni anyqtaldy.

- Sot sheshimimen talapkerdiń paıdasyna 17 mln 840 myń teńge kóleminde avtokólik quny, 1 mln 784 myń teńge turaqsyzdyq aıyby, sot saraptamasyn júrgizýge ketken 112, 631 myń teńge, 177, 960 myń sot shyǵyny, 500 myń teńge ókildiń qyzmeti jáne 196,240 myń teńge memlekettik baj salyǵy óndirildi.

Jaýapker munymen kelispeı, apellıatsııalyq shaǵym túsirdi. Apellıatsııalyq satydaǵy sot alqasy № 2 Oral qalalyq sotynyń sheshimin ózgerissiz qaldyrdy, - dep habarlady vedomstvodan. 

Eske sala keteıik, budan buryn BQO turǵyny avtosalonnan sapasyz kólik úshin tólengen 9,6 mln teńgesin qaıtaryp alǵanyn jazǵan edik.