Oral turǵyndary: Jańbyr jaýǵan saıyn kóshemiz sýǵa tolady
ORAL. KAZINFORM — Oral qalasy «Juldyz» shaǵynaýdanyndaǵy F.Ońǵarsynova kóshesi jańbyr jaýǵan saıyn sýǵa tolatyny, oǵan jol salynbaı otyrǵany jóninde áleýmettik jelide beınejazba jarııalandy.
Qala turǵynynyń málim etkenindeı, budan eki jyl buryn saıajaıdaǵy baspanalary sýǵa ketkenderge osy kósheden úı berilgen.
Onyń sózine qaraǵanda, F.Ońǵarsynova kóshesi 110-nan 128-úıge deıingi aralyq batpaqqa batyp jatyr.
— Bizdiń janaıqaıymyzdy kim túsinedi? Saıajaıdyń balshyǵynan qutyldyq pa dep kelgende, jaǵdaıymyz osylaı bolyp tur. Ózimiz sýdan qashyp kelip edik. Jańbyr jaýsa, sýǵa ketemiz. Balalarymyz mektepke, balabaqshaǵa bara almaıdy. Jeke kólikterimiz kire almaıdy. Jol salynady dep ýáde berilgenimen, oryndalmaı tur, — deıdi turǵyn.
Osyǵan oraı Kazinform tilshisi Oral qalasy ákimdigine arnaıy saýal joldaǵan edi.
Ákimdikten túsken málimetke qaraǵanda, qazirgi tańda «Juldyz» shaǵynaýdanynda ishki kvartaldyq avtomobıl joldaryn rekonstrýktsııalaý jobasy kezeń-kezeńimen júzege asyrylyp jatyr.
Búginde joldardyń bir bóligine asfalt-beton jabyny tóselse, jekelegen ýchaskelerde qıyrshyq tas salynǵan. Qalǵan bólikterinde qurylys jumystary joba boıynsha jalǵasatyn bolady.
— Turǵyndardyń qolaıly júrip-turýyn qamtamasyz etý maqsatynda bıyl ýaqytsha shara retinde Oral-Jelaev avtomobıl jolyn ortasha jóndeý barysynda alynatyn frezerlengen asfalt materıaly «Juldyz» shaǵynaýdanyndaǵy topyraq kúıinde jatqan kóshelerge tóseledi. Bul sheshim joldardyń paıdalaný jaǵdaıyn jaqsartyp, shańdy azaıtýǵa jáne kólik qozǵalysyna qolaıly jaǵdaı jasaýǵa múmkindik beredi, — delingen resmı jaýapta.
Áleýmettik jelide jarııalanǵan taǵy bir beınejazbada «Eski áýejaı» aýdany Jaýynger ınternatsıonalıster kóshesiniń turǵyndary K.Malın men I.Konıahın kósheleriniń qıylysynda jaz mezgilinde jańbyr jaýǵan saıyn, kóktemde qar erigende sý jınalatynyn jetkizdi.
Turǵynnyń aıtýynsha, kósheniń osy bóliginde asfalt eńiske tóselgen, sonyń saldarynan árdaıym osyndaı kommýnaldyq másele týyndaıdy. Turǵyndar habarlaǵan kezde assenızator jiberilip, sýdy soryp turady, biraq bul máseleni sheshpeıdi.
Oral qalasy ákimdiginiń málimetine sáıkes atalǵan avtomobıl joly ýchaskesinde qazirgi ýaqytta jóndeý jumystaryn júrgizýge qarjy kózdelmegen. Aldaǵy ýaqytta avtomobıl joldaryn aǵymdaǵy jóndeýge bólingen bıýdjet qarajaty únemdelgen jaǵdaıda osy ýchaskede tıisti jumystardy oryndaý múmkindigi qarastyrylady.
Bıyl Batys Qazaqstan oblysynda kóktem de, jaz da jańbyrly bolyp tur.
Eske sala keteıik, budan buryn Oralda turǵyndar káriz sýynyń jertólege quıylyp jatqanyn aıtyp shaǵymdanǵanyn jazǵan edik.
