Oral turǵyndary sý men jylý joqtyǵyn aıtyp shaǵymdandy
ORAL. KAZINFORM — Oral qalasynda bes otbasy birneshe kún boıy sý men jylýsyz qalyp otyr.
Turǵyndardyń sózine qaraǵanda, Cherekaev kóshesi 52-mekenjaıy tusynda sý qubyry 17 aqpan kúni saǵat 18.00 shamasynda jarylǵan.
Apattyq qyzmet kelip, sýdy japqan. Sýmen jabdyqtaýǵa baılanysty bolǵandyqtan, jylý da aıyrylǵan.
— Mine, sodan beri sý da joq, jylý da joq, tońyp otyrmyz. Páterlerde salqyn, temperatýra 15-16 gradýs shamasynda. Jylyný úshin gaz plıtasyn qostyq. Turmystyq qajettilik úshin qardy eritemiz. Osy úıde turatyn bes otbasynda segiz bala bar. Jýyný múmkin bolmaǵandyqtan, olardy mektepke de jibere almaı otyrmyz. Barlyq qyzmetke, ákimdikke habarlastyq. Biraq máselemiz sheshiler emes. Bul tótenshe jaǵdaı dep esepteımin, — deıdi atalmysh úı turǵyny.
Onyń aıtýynsha, turǵyn úı eshkimniń teńgeriminde joq. «Batys sý arnasy» JShS mamandary sý júıesi tolyqtaı tozǵan, barlyǵy aýystyrýdy qajet etedi dep tapqan. Jumystyń aldyn ala quny — 800 myń teńge shamasynda. Muny birden jınap berý múmkin emes, birtindep tóleýge bolar edi.
Osyǵan oraı Kazinform tilshisi Oral qalasy ákimdigine habarlasqan edi.
Ákimdik málimetine qaraǵanda, atalǵan úıdiń úıishilik sý qubyrlary «Batys sý arnasy» JShS teńgeriminde joq. Soǵan qaramastan, kásiporyn mamandary oqıǵa ornyna jedel baryp, tekserý júrgizip, qajetti qalpyna keltirý jumystarynyń kólemin anyqtady.
— Qala ákimdigi tarapynan «Batys sý arnasy» JShS-na apattyq qalpyna keltirý jumystaryn qysqa merzimde oryndap, apat saldaryn joıyp, sýmen qamtamasyz etý tapsyryldy. Odan keıin sý júıesi kásiporyn teńgeriminde joqtyǵyn eskere otyryp, keltirilgen shyǵyn kólemin zańda kózdelgen tártippen turǵyn úı turǵyndarymen sheshý máselesi retteletin bolady, — delingen resmı jaýapta.
Eske sala keteıik, budan buryn Oralda qubyrdaǵy apat saldarynan 400 abonenttiń sýsyz qalǵanyn jazǵan edik.