Oral turǵyndary polıgon tútininen tynys alý qıyndaǵanyn aıtyp shaǵymdandy
ORAL. KAZINFORM — Oralda qatty turmystyq qaldyqtar polıgonynan shyqqan tútinnen tynys alý qıyndaǵany jóninde áleýmettik jelide aqparat jarııalandy.
Turǵyndardyń sózine qaraǵanda, jel polıgon jaqtan soqsa, qalany tútin basady.
Zachagan kentinen 15 shaqyrym qashyqtyqta ornalasqan polıgonda órt 27 shilde kúni shyqqan edi.
Osyǵan oraı Kazinform tilshisi qazirgi jaǵdaıdy anyqtap bilgen edi.
Oral qalasy ákimdiginen túsken málimetke qaraǵanda, polıgonda órt saldaryn joıý jumystary jalǵasyp jatyr. Búgingi tańda órt shalǵan 15 ga aýmaqtyń 12,5 gektary tolyq sóndirildi. Kúni búgin 2,5 gektar aýmaqta byqsyp jatqan jerler bar.
Qazirgi ýaqytta byqsyp jatqan jerlerge sý sebý jáne sóndirilgen ýchaskelerdi topyraqpen jabý (rekýltıvatsııalaý) jumystary júrgizilip jatyr. Jumys bastalǵaly beri polıgonǵa 94 305 tonna topyraq jetkizilip, 8 630 tekshe metr sý paıdalanyldy.
- Órt saldaryn joıý jumystaryna tótenshe jaǵdaılar departamenti men jergilikti atqarýshy organdardyń kúshteri men quraldary jumyldyrylǵan. Oqıǵa ornynda 37 adam jáne 25 tehnıka jumys istep jatyr. Olardyń qatarynda avtotsısternalar, sý tasymaldaýshy kólik, júk samosvaldary, býldozerler, tıegishter, ekskavator jáne ózge de arnaıy tehnıka bar. Jaǵdaı turaqty baqylaýda. Byqsý oshaqtary tolyq joıylǵanǵa deıin jumystar jalǵasatyn bolady, - delingen resmı jaýapta.
Polıgonda qoqystyń janýyna baılanysty Oral qalalyq sanıtarııalyq-epıdemıologııalyq baqylaý basqarmasynyń mamandary «Ulttyq saraptama ortalyǵy» RMK fılıalynyń zerthana qyzmetkerlerimen birlesip, sanıtarııalyq-qorǵaý aımaǵynyń turǵyn úı qurylystarymen shektesetin bóliginde atmosferalyq aýanyń sapasyna zerthanalyq zertteýler júrgizdi.
BQO sanıtarııalyq-epıdemıologııalyq baqylaý departamentiniń baspasóz mamany Kenjegúl Muhıtovanyń málim etkenindeı, zerthanalyq zertteý nátıjeleri boıynsha Derkól kenti aýmaǵynan alynǵan jekelegen aýa synamalarynda kúkirtsýtek pen kómirtegi totyǵy mólsheriniń shekti ruqsat etilgen deńgeıden asqany tirkeldi.
- Zertteý qorytyndylary men alynǵan málimetter ýákiletti memlekettik organdarǵa, atap aıtqanda, Batys Qazaqstan oblysynyń ekologııa departamentine, Oral qalasynyń tótenshe jaǵdaılar basqarmasyna jáne Oral qalasynyń ákimine tıisti sharalardy qabyldaý úshin joldandy. Erteń taǵy da synama alynyp, zertteledi, - dedi K.Muhıtova.
BQO boıynsha ekologııa departamentiniń basshysy Murat Ermekqalıev polıgondy basqarýǵa alǵan «ICM Recycling» kompanııasyna qatysty jospardan tys tekserý júrgizilip jatqanyn jetkizdi.
Eske sala keteıik, budan buryn Oralda qatty turmystyq qaldyqtar polıgony órtenip jatqanyn jazǵan edik.
Sondaı-aq Oralda tótenshe jaǵdaı jarııalandy.
