Oral transformator zaýyty qıyn jaǵdaıǵa tap bolǵan otbasylarǵa 2,5 mln teńge bóldi

ORAL. QazAqparat – Oral transformator zaýyty «Bolashaq» qaýymdastyǵy keńesi músheleriniń qoldaýymen tótenshe jaǵdaı kezinde qıyn jaǵdaıǵa tap bolǵan otbasylarǵa 2,5 mln teńge bóldi, dep habarlaıdy QazAqparat tilshisi.

BQO boıynsha «Bolashaq» qaýymdastyǵynyń tóraıymy Saltanat Tumanbaevanyń aıtýynsha, budan buryn atalǵan kásiporyn az qamtylǵan 60 otbasyǵa, sonyń ishinde osy transformator zaýytynda jumys jasaıtyndarǵa qaıyrymdylyq kómegin kórsetken edi.

25 sáýir, senbi kúni aldymen «Shańyraq» jasóspirimder úıindegi 64 otbasyǵa qoldaý jasaldy.

Oǵan qosa qaýymdastyq eriktileri qaladaǵy az qamtylǵan 136 úıdi aralap, azyq-túlik sebetin tabys etti.

Osylaısha barlyǵy 200 otbasyǵa járdem berildi.

Azyq-túlik sebetine asa qajetti taýarlarmen qatar turmystyq tazalaǵysh zattar men jeke gıgıena quraldary kiredi. Oǵan qosa «Shańyraq» jasóspirimder úıine sonda turatyn balalardyń onlaın sabaǵyn oqýyna qajetti teledıdar syıǵa tartyldy.

Aıta ketken jón, quramyna «Oral transformator zaýyty» JShS kiretin «Alageum Electric» kompanııalar toby koronavırýs indetimen kúreske 100 mln teńge qarastyrdy. Sonyń ishinde «Birgemiz» respýblıkalyq qoryna jáne elimizdiń ózge óńirlerine qarajat bólindi.

Eske sala keteıik , budan buryn Batys Qazaqstanda 1400-ge jýyq adamnyń úıde oqshaýlanǵanyn jazǵan bolatynbyz.