Oral temirjol vokzaly saltanatty túrde ashyldy
ORAL. KAZINFORM — Temirjol kóligi qyzmetkerleriniń kásibı merekesi qarsańynda kúrdeli jóndeýden ótken Oral temirjol vokzaly paıdalanýǵa berildi. Saltanatty is-sharaǵa oblys ákimi Narıman Tóreǵalıev, QR Kólik mınıstri Nurlan Saýranbaev, «Qazaqstan temir joly» ulttyq kompanııasynyń qurylys jónindegi basqarýshy dırektory Marat Esqalıev, sala qyzmetkerleri men ardagerleri, óńir turǵyndary men qonaqtary qatysty.
Aımaq basshysy Narıman Tóreǵalıev temirjolshylardy aıtýly datamen, óńir jurtshylyǵyn vokzaldyń ashylýymen quttyqtady.
Prezıdent Qasym-Jomart Toqaevtyń elimizdiń kólik-logıstıkalyq ınfraqurylymyn jańǵyrtý jónindegi tapsyrmasy aıasynda «Qazaqstan temir joly» ulttyq kompanııasynyń tapsyrysymen óńirdegi 4 temirjol vokzalyn qaıta jańartý jumystary sátti júzege asyrylǵanyn atap ótti.
— Shyńǵyrlaý, Tasqala aýdandarynda temirjol vokzaldary bastan-aıaq buzylyp jańadan salyndy. Aqsaı qalasy men oblys ortalyǵyndaǵy nysandar qaıta jańǵyrtyldy. Bul maqsatqa respýblıkalyq jáne jergilikti bıýdjet esebinen 7,6 mlrd teńge jumsaldy. Osylaısha Memleket basshysynyń tapsyrmasy tolyq oryndaldy. Sán-saltanaty kelisken ǵımarat qurylysyn sapaly ári merziminde aıaqtaǵan merdiger kompanııa ujymyna oblys jurtshylyǵy atynan rızashylyǵymdy bildiremin! Halyq jańa nysannyń ıgiligin uzaq ýaqyt kóretinine senim mol, — dedi Narıman Tóreǵalıev.
Sharada temirjolshylar men qurylysshylar Kólik mınıstri men aımaq basshysynyń alǵys hattaryna ıe boldy.
Jańǵyrǵan nysanda jolaýshylardyń qolaılylyǵy úshin 4 eskalator, 3 jedelsaty ornatylyp, zamanaýı konkorstyq ótkel salyndy.
Ana men bala, qonaqúı bólmeleri, sondaı-aq erekshe qajettiligi bar azamattar úshin de tıisti jaǵdaı qarastyryldy. Vokzaldaǵy barlyq ınjenerlik ınfraqurylym jelileri jańartyldy. Jergilikti bıýdjet esebinen ǵımaratqa irgeles aýmaq abattandyryldy.
Aıta keteıik, Oral temirjol vokzaly arqyly 1 halyqaralyq, 3 oblysaralyq jáne 2 oblysishilik turaqty jolaýshylar tasymaly júzege asyrylady. Jańa ǵımarat arqyly táýligine 1800 jolaýshy jáne 7 jup poıyz qatynaıdy.
